Read Medumba Yob 29 Bible Online

Yob 29 - Medumba bible

Yob 29

¹Yob bèn ndo' ntshob nèn yi mbwe ntshob ndù:

²Be we bèn ngù me be mba me na' mbe, ndùse Nsi na' nke ndôt'àm n'à!

³Ndùse lambo se ke nké' num tu àm, nelàn i nke ntshagt'àm ntùm njam n'à!

⁴Wé! Me lo nke' neta mb'a na' mbe tsemo' lé'njù là, lé'njù tse Nsi na' nke ndôte ndà àm mba nshum àm nà.

⁵Ndùse Nganeta Ntshùate na' nke' yàm mèn, bon tshàm nke nke' ntswete mbaṅ àm nà.

⁶Ndùse nku màm ke ntsho ntùm mbùn, gholoṅ (loṅ tshab) nke nsô mfèt me yàm nà;

⁷ndùse me ke ntum nèn mfe nsém tusô, nke ntswe num ntàn num kam nà.

⁸Ghuan benntùn lo ke mbe yen àm yen ngelaṅ nà nde'e, ywèn benntùn nke ndo ntsinte tù.

⁹Kamànyam nke ntsin ke bèn ntshob nu, nke njab bu ntshu bo.

¹⁰Nze ben ndùbndùb lo ke ntsine, lém sob lat bam ntag mube.

¹¹Ntoṅ mi a ke nju' àm nà lo ke ntsiaṅ àm mènfen, lag s'a tshwèt njen àm nà nke nkwé nta màm.

¹²Nummbe me lo ke ntshu' mbwoṅ z'a bètte ywimte là, nke ntomte ménntse z'a bwoṅ dù' neyé'te bwe là.

¹³Mbotni ngavùkob na' nke nse' à num àm; me nke ngù ntù mfôg mènnzwi dun tsiaṅte.

¹⁴Me lo ke nket nunetsin num àm mba kum nà, nke ma' nu ndaṅndaṅ mba kummbaṅ nà, ntaṅ i mba kuttu là.

¹⁵Me na' mbèn mbe se lag mfùmiag, mbe ze ku nke'kèt.

¹⁶Me na' nke mb'a tà ghayennge', nke ndôte ze nu mfàm.

¹⁷Me lo ke mbe' ngag ntshu mèn z'a ke' tsin nà, nke nsô ju z'a ghom nà ntùm nsô mi.

¹⁸Ndùlala nke ntshob ndù: Me nsi kwù a ntùm yàm nkàn, lé'njù tshàm nsi yàm mba nkwango' là.

¹⁹Ntse nsi tsho ntùm nga tshàm, meme' nsi zi num nkaṅ màm.

²⁰Ghamt'àm nsi bèn tob kà ke tag, ngonkél àm nsi bèn tù' ze nswe bu àm.

²¹Mba we lo lo ke nju' àm, mbe tswe nke mbébe. Mba we lo ke nju' màm ntag à ntùm ntshu mi'i.

²²Me lo ke ntshob mèn ke sô ju bwe. Ntshob màm na' nke mb'a mba meme' z'a se' mebwô là, num njoṅ benntùn fa.

²³Bo na' nke mbéb àm mba bo num mbéb mbaṅ nà. Bo lo ke nga' ntshu mbéb à mba bo num mbéb njwèt mbaṅ nà.

²⁴Me lo nyu' yub zwi ndùse fènntù mi bo là, bo ke ku'ni neta' nelàn z'a tshwèt ntum se àm nà.

²⁵Me lo ke nkô nenèn mbaṅ bo, ntsin mbwe mba mfen z'a tswe netèt bwoṅ soyé là. mba ta' ngafitentù là netèt ghayennge'.