Read Medumba Yob 3 Bible Online

Yob 3 - Medumba bible

Yob 3

¹Ndùlala Yob gha' ntshu i, nso ndon num lé'njù se bo bwe i là.

³Me num nke ndiag ndù Nsi bwete lé'njù se bo bwe àm bwe là. Mba tèttswe' ze bo na' ntshob ndù bo lèt mén mandum bwe là.

⁴A bwô ndù sen lé'njù là tam njame. Kà Nsi bèn nkwate mo' ju bwe mfe kamànyam. Kà lèn ntshùa nelàn bèn ndiaṅ num sen lé'njù là.

⁵A bwô ndù njam bo netshaṅ vùkob kab mbu num sen lé'njù là. A bwô ndù ndot se ka num i, tshu nesèn ts'a kuni là nyi't'é.

⁶A bwô ndù ba njam kab mbu num yen tèttswe' là. Yen tèttswe' là bi ze ntùm ngu'njù. Kà bo bèn nsiaṅ i ntùm ba ṅwù!

⁷Yen tèttswe' là tu' ze kebwe, neṅwate mi ze ntùm bwe!

⁸ben tse bo num nso ndon tu ba lé'njù là so ndon tu i, ben tse bo num ntènte ngamnyu là.

⁹A bwô ndù mi nsa mfôgnjù yen tèttswe' là tam njame, k'a mi nke mbéb nelàn à banban, ke bèn nku'ni neyen mba miag mfôgnjù ké'te là.

¹⁰Nummbe yen tèttswe' là lo ke fùn bam s'a lèl àm nà, ke bèn nsô nge' num miag màm.

¹¹Numke me na' mbe ke kwù bam màa à? Numke me na' mbe tum tun i ke yoṅ nkwù à?

¹²Numke me na' mfon ntammbwe mi a kèl àm n'à? Numke me na' mfon mbùn mi a nyô àm n'à?

¹³Mba me be tshàm à nsi nenô ndonni, mba me tshwèt nzi tshàm, nke mfite tshàm,

¹⁴bag à fenfen boa ben ndùbndùb num tsha'a, tshen nà tse bo na' ntshob bo kut ba mba' ntufi mub là,

¹⁵bag à kamkam tse bo na' ngù gol, ngù silba t'a dun ntùm ndà tshob là.

¹⁶Mba me ke' be tshàm bwe, mba me be tshàm à mba ta' sôbam ze bo lem nà, mba bon tse bo be tum ndù bo yà kwù là.

¹⁷Ghatshùagntù ke' be tam mvèt yen dù' là. Ben tse bo bole, neta bwoṅ bo là nsi fite bwe.

¹⁸Njoṅ kuan ntsho fa be tshob à ntùm fite bwe. Bo ke' be ju' tshob nze ngafétte.

¹⁹Mén bo ndùb b'a bwe. Nkuan ke' be ju'ni tàfa' i bwe.

²⁰Numke Nsi njôg mfà nelàn ghayennge', yôg be ben tse ntù yub dun zwe l'à?

²¹Bo num nywinte vùkob, a ke se'. Bo ke ndiag vùkob à ntùm kùntù mba mèn be ndiag junkàb là.

²²Bo ghù nedun tsiaṅte, nke ṅwate, tsiaṅte lo' yub ndùse bo fon fi là.

²³Numke Nsi mfaṅ tshen ben nà ntùn à? Bo ke' lèn dù' bo tshùa bwe là. Nsi ke' fà manze netum bwe bo.

²⁴Nge' tshàm b'a yàm jujù, nkua' màm ke nsa à mba ntse là.

²⁵Ju ze me num mbwôg là b'a z'a be ntsho àm nà. Ju ze me num magte là b'a z'a be nkab mbu num àm nà.

²⁶Me ke' ghù mbétni, ke ghù fite, ke ghù ntswe ntùn. Neyen nge' se ka num àm.