Read Medumba Yob 31 Bible Online

Yob 31 - Medumba bible

Yob 31

¹Me lo wat kàn bag miag màm, mbe ndù be me ke lôte ménngon bo ke' yoṅ ntabt'é là miag mbàa.

²Kua' ke ze Nsi lé' me mfe tù à? Kua' mit ntsi' mi Nganeta Ntshùate tswe kamànyam ntum m'à?

³Nevù b'a ze nu ngatshùagntù, nge' be ze nu ben tse bo num mfàn nu là.

⁴Nsi lo ke lèn tshàm manze ké? A lo ke siaṅ njoṅ nku màm fa ké?

⁵A be ze bag tatte tam nze nzine, a be ze ku àm fùag nsi num fùte là,

⁶mb'a bwô ndù Nsi fi' àm ntùm nkilô nenùne, mbèn ndèn ndù à yen àm me b'a mèn netsine!

⁷A be ze ku àm lo num nze ndaṅndaṅ, a be ze ntù àm tam njam miag màm nà, a be ze mo' nesagte lat mum mbu màm nà,

⁸mb'a bwô ndù me ywile, mènghua bèn ntsho', bo bèn ntsho' nzwil àm nsi fa kô tun.

⁹A be ze ta' mènnzwi na' ndo' ntù àm, me tswe nzendà yàm mèn ndùla' nke nya' nzwi i là,

¹⁰mb'a bwô ndù yàm ko' mènnzwi na bàn mo' mènghua, mbèn ntù' nzwi ba mfàm.

¹¹Nummbe yen nà b'a nezwi mèn, mbe nu ndù bo num ntswe nsi kam se.

¹²A ta' mbwôg ndù a num nkù tshu fafa; yen mbwôg là tsham njoṅ tshu tshàm fa tà nkum num nga tse.

¹³A be ze me na' nga ju ze ngafa' àm ze mandum ke ze mènnzwi lo tshwèt mbètte ndù a ku'ni num bwe, bag yi ta ntshu là,

¹⁴mba m'a' ghù à ndùke ndùse Nsi lo nsi l'à? mba me nsi bùnt'a ndùke ndùse Nsi a' tsho't'àm n'à?

¹⁵A ke Nsi z'a na' mfi' àm bam màa bèn mfi' i ké? A ke be Nsi ntshù' na' mbèn mfi' yag bam mà yag ké?

¹⁶Me lo ke gha ywimte ze mbwoṅ bètte là yi. Ke bam ndù mènnzwi ke nywint'a nda' nenywinte.

¹⁷Me lo ke bam ndù ménntse tswe nziku' ndùse me tshwèt njù jujù là.

¹⁸Me lo ke ntomt'é mba ta' tà là fe ndùse me be ménnshum nà.

¹⁹Ndùse me yen njennge' nke mbwoṅ nzwe, mbwoṅ ke ghù nzwe mfùag là,

²⁰me fà nzwe ze bo lo' nyiaṅ njùmbwe tshàm mba' yi là yi. Ndùlala a labt'àm njoṅ ntù i fa.

²¹Me lo ke to' fétte ménntse, mba mba me na' ndèn ndù ywimte nsi be me ndà ntsha là.

²²A be ze me na' ngù lèn tshen tshu là là mb'a bwô ndù shua'mbe' sàm tsho' num wul àm, bu àm bèn ntshet kà mfiage.

²³Nummbe me lo ke mbwôg ze nevù ntsha Nsi, ke ku'ni tshàm neghù lèn yen ju là.

²⁴Me lo ke yab ntù num gol, ke tshob gol ntùn ndù: O b'a yàm ndàlem.

²⁵Me lo ke tshob ntù àm ntùm tsiaṅte ndù a ghù tshu yàme. Ke tsiaṅte mba mbu màm diag tà ngù là.

²⁶Mba ndùse me ke njen lagnyam nziage, nke njen maṅwù nke nké' ntùm nkuni mi là.

²⁷Lagnyam bo maṅwù lo ke lo' ntù àm mba kua' njamnjam, mba nda' bu àm lo ke tate yub num neghamte yub mba Nsi là.

²⁸A na' ntôg ndùlala mb'a b'a mfànnu mi be kam se te nsi là, nummbe mb'a b'a ndù me gha Nsi z'a mfe tù là.

²⁹Me lo ke to' tsiaṅte ndùse nge' tsho' ngakeban àm nà, ke to' ṅwate ndùse nge' kab mbu num i là.

³⁰Me lo ke to' bam ndù lém sàm ghù nukebwô, ke so ndon tu ngakeban, mbètte ndù a kwù.

³¹Njoṅ benntùn fa tse bo ke mfa' me là lèn ndù ghùn lo ke njù ndà àm kà njwèle.

³²Ngùn lo ke be zi ntshundà la' àm. Yàm nzendà ke mb'a be nge nelo' ben bo nèn nkatte là.

³³Me lo ke to' lem tshàm mfànnu màm mba tsemo' ben nà. Me lo ke lem nukebwô àm ntù àm.

³⁴Me lo ke bwôg bwoṅ benntùn, ke bwôg tshabte tunndà yàme. Me lo ke tswe ntshu mi'i, ke bwôg netum la' àm ndùse benntùn tshwèt njen àm nà.

³⁵Ndù mèn ke bwe z'a ju' mba me tshwèt ntshob ké? Me lèn ndù mba mit ntshob lo b'a nenùne. Bin faṅ nà Nganeta Ntshùate bùnte me. A bwô ndù ngamaṅt'àm kite ndo' mbot'àm yi.

³⁶Mba me nsi taṅ yen ṅwa'ni là mvèn àm, taṅ i num se àm mba kétmbùn nà.

³⁷Mba me nsi soṅ Nsi mba ke lo ze me ghù là, mba me nsi nèn mbwe i ntùm neṅwate.

³⁸A be ze tshàm tsha' kua' num àm, ngônà tse fètte ntsenyà là,

³⁹a be ze me na' njù ntàm mi ke jun, nso sobni ntù ko' ghatsha' là,

⁴⁰mb'a bwô ndù njô mbit num dù' ngefele, nenà kebwô bit num dù' nsa! mi ntshob Yob tsin nsen ni.