Read Medumba Yob 32 Bible Online

Yob 32 - Medumba bible

Yob 32

¹Mba Yob ke nke' nsaṅlaṅ nela'te mb'a b'a mèn netsin nà, tshen bandum tat li tsin ke bèn mbùnte nu yi.

²Ndùlala yantù Eliu kam. Eliu na' mb'a nshum Barakél ze Buz, mbe tunndà Ram. Yantù Eliu kam à nummbe Yob lo ke mbab ndù' mb'a b'a nelàn mbwe Nsi.

³Yantù lo bèn nkam mba num shun Yob tat, nummbe bo lo ke fon ju ze bo bùnte Yob là, ntù' ke ndo' Nsi ngù ngafànnu yi.

⁴Eliu lo ghom wul i nebùnte nu Yob, nummb'a na' mb'a ze nke' netèt bo.

⁵Là ndùs'a yen bo ke bèn nebùnte nu Yob là, yantù yoṅ nkame.

⁶Ndùlala Eliu nshum Barakél ze Buz bùnte ntshob ndù: me ke' à mônke' num ngu'njù tshàm, tu wut tsin be ntshùambwe tshàm. Ndùlala lo mbèn ngù kà me mfi, ke la'te mba ju ze me lèn nà bin.

⁷Me lo ke ntshob ndù: Be ngu'njù tshob nu bo ju', mba ndù ngu'njù yàm ghù nela'te zenu.

⁸Nda' ndù ywèt ts'a be num mènntùn nà, ywèt Nganeta Ntshùate bèn nke mfà nesiaṅte.

⁹A ke' b'a ben tse ngu'njù tshob yàm nà bèn mbèn nke ndèn zenu bo nunetsine.

¹⁰A ndùlala, bin ju' me, me la'te zin yàm mba me lèn nà.

¹¹Me lo mbéb ntùm nefènte ndù bin tshob nu. Me lo nkù' ntoṅ num nkwatenu mine, num ngelaṅ fa ze bin lo nke nta ntshu là.

¹²Me lo nke mbwe nu à mbe mi. Là sàm zin mèn lo ke kôg Yob nte nsi, sàm mèn ke fon mbùn ntshob num nkwatenu mi.

¹³Kà bin tshob ndù: bag fon zenu. A b'a Nsi bèn ngù nebùnte nu Yob, ke b'a mènntùn.

¹⁴Yob tshob nu à bin ke b'a me. A lo mb'a me mb'a be me fon mo' mat ghua nefà mbùn ntshob yi ke b'a mba min nà.

¹⁵Bo bwôg ke bèn mbùnte nu, ntshob bwoṅ ntshu bo.

¹⁶Me lo béb ndù bo miagte mub ntshobe. Bo tsin tshob ke ku'ni nebèn ntshob nu.

¹⁷Tshù yàm ngelaṅ ni, mba m'a' bùnte yàm. Me kô netshob ju ze me lèn nà.

¹⁸Nummbe ntshob dun ntshu àm. Ywèt tshwèt ntènt'àm ntù àm.

¹⁹Me ke mbùn ntùm bwe à mba ndu' z'a tsiag là, mba ba ntu' ngub nswe ts'a tù' nebèt là.

²⁰M'a' tshob kà njôg nzwiag mebwô, m'a' gha' ntshu àm mbùnte nu.

²¹Me ke nsi lôte miag mèn, me ke nsi batte sàm mèn.

²²Nummbe me ke' lèn tshàm batte. Ntag ndùlala mb'a lo bwô ndù Mbom mèn zwi àm be kua' nedum, ke béb.