Read Medumba Yob 33 Bible Online

Yob 33 - Medumba bible

Yob 33

¹Yob, ndonni kù' ntoṅ mu nju' ju ze me nsi tshob là.

²Tshù, me gha' ntshu àm, lém sàm b'a tun ntag màm, mb'a' tshob nu.

³M'a' tshob à ntùm ntù ndaṅndaṅ. A kua' nenùn ze nkub ntshu màm tshob là.

⁴Ywèt Nsi lo nabt'àm, ywèt Nganeta Ntshùate num mfà zwiag me.

⁵A be z'o ku'ni là, o bùnte me. Tshètte yu njam mbwe àm, ghù tànntù.

⁶Me b'a nguan o mbwe Nsi. Bo na' ndo' à mbab mbom àm yi mba yu tu wut là.

⁷A ndùlala, a ke' bwô ndù mbu màm bwe't'o, ke bwô ndù o yen mba m'a' be't'o à nebe'te là.

⁸Tshù, tu wul o lo tshob num ntoṅ màm, me ju' kua' men ntshob là ndù:

⁹Me b'a nelàne, ke lèn nukebwô. Me b'a mbu'u, mo' sàm lo' ke num me.

¹⁰Nsi z'a tshwèt ndo' ba latnta num àm nà. tshwèt ndo' àm mba ze ngakeban nà.

¹¹A so nku màm ntùm kebu'u, me nke mbe tsho' ku àm nsi a nke ndôt'àm.

¹²Yob, me soṅ o ndù o fùt'a wul o; nummbe Nsi b'a mèn ndùb ntshùa mènntùn.

¹³Numk'o nke nja ntù yi mb'a ke' fà lèn mbùn ntshob num ntshob mu l'à?

¹⁴Nummbe Nsi ke ntshob nu mèn à num mat nzenze, là mèn ke ke nju' tu i bwe mebwô.

¹⁵A num ntshùa ntùm ba njem tse mèn be njene, tse mèn be nzi tèttswe', ndùse miaglo ghom benntùn nta num bo, kà mènntùn ke bèn neghù ngù' num kunndà se là.

¹⁶Nsi num ngù bo ju' ju z'a tshob là, a te màkwa ts'a zi'te yub yi là;

¹⁷ndùlala ndù a sô yub num nukebwô, nkabte yub num ko'tewut.

¹⁸Nsi a' tshu' ntù yub ntùm gheme, nkabte yôg sob ndù kà ṅwi wat yube.

¹⁹A num ntshùa ntùm sobni Nsi zi'te mènntùn num kunndà se, ngù mvôg mi nke mfèl i ntùm wul i.

²⁰Ntshu i ke' be tshùa num jujù yen ngelaṅ nà. Mba kua' jujù ntùn nke mbag i nebage.

²¹Mbàb wul i bi, nsàmte, mvôg mi mi bo na' mbe ke ke njen nà tumte fa.

²²Ntù i ghebte mbaṅ gheme, yôg se ghebte mbaṅ ben bo yà kwù là.

²³Là, a be ta' Angél be mbaṅ i, mbe nganze netèt tse ntsha' mbùm, num nela'te mènntùn mb'a bwô ndù a ghù là,

²⁴mba yen Angél là nsi ko ndèn mi tshob Nsi ndù: Kà bam ndù a nèn ntùm gheme! Me fon ju nelo' ntshu' i yi.

²⁵Mbàb wul i bèn mbotte ntshùa ndùs'a be ménfi là. A bèn ntù' ménnshum mb'a na' mbe là.

²⁶A num nde'te Nsi, a ju' nz'é. A num ntam lag num se Nsi ntùm ṅwate. Nsi a' bèn ngù nunetsin yi mo' yoṅ i.

²⁷A num ntsiaṅte mbwe benntùn nke ntshob ndù: Me lo ghù nukebwô, mbagte nu z'a tsin nà, là Nsi ke ghù m'a ndaṅndaṅ mba nukebwô tshàm be yi là.

²⁸A lo tshètte ntù àm, ke bam ndù a nèn ntùm gheme; ndonni yôg b'a bam nelàne.

²⁹Tshù njoṅ ju fa ze Nsi ghù num mènntùn tà nkum yoṅ bàa, yoṅ tat là.

³⁰Yen nà b'a ndù a sô ntù i gheme, ndo' nelàn ben tse bo be ntùn nà nké't'é yi.

³¹Yob, kù' ntoṅ nju' àm, mi ntswe, mfaṅ me tshobe.

³²A be z'o ghù ju netshob là o bùnte me. Tshobe, me lo nke ndiag à ndù o loṅ kame.

³³Ntag ndùlala o ju' me. Mi ntswe, mfaṅ me zi't'o zenu.