Read Medumba Yob 34 Bible Online

Yob 34 - Medumba bible

Yob 34

¹Eliu bèn ntshob ndù:

²Bin ju' ntshob màm me ghazenu.

³Nummbe ntoṅ num nju' nze ntshob a be mba ntag mèn num nju' mba jujù lo' ndamte yi là.

⁴Bag bin tsho' ju z'a tsin nà. Be lôte netèt be ndèn ju z'a bwô là.

⁵Yob ke ntshob à mb'a b'a mbu'u, mba ndù Nsi mi nga neghù nunetsin yi.

⁶Ndù me tù' b'a ngatatte mba me bètte nu ndaṅndaṅ nà ké? Yàm mfaṅ b'a ketùn mfaṅ, ndù me ke' ghù tshàm nukebwô.

⁷Be be yen ta' mènntùn yà mba Yob, z'a b'a nu tshabte mba ntse l'à? z'a b'a nke ntshob nu Nsi ke bwôg ndù à?

⁸A num ntam mbob boa ghaghù kebwô, nke nzin boa ben kebwô.

⁹Tshù a num ntshob ndù: a ke' ywimte mènntùn sàm ju neke ngù ju ze Nsi num nkô là.

¹⁰Ghankwate, a bwô bin ju' àm! sàm nu z'a ke' tsin nà ke tse mbaṅ Nsi. Nukebwô ke tse mbaṅ Nganeta Ntshùate.

¹¹A ke ngù mènntùn à mba mfa' mi be yi là, nke mfà mba we lo à num nzin mi.

¹²Nga, kua' nenùn Nsi ke' be ghù nukebwô. Nganeta Ntshùate ke' be gha nunetsin sàm mènntùn mba ntshù'.

¹³We z'a na' njab i ndù a tô njù à? We z'a na' ndem nsitsha' ndù a ke ndôt'à?

¹⁴Nsi lo nke nkwate nda' tu wul i, a lo nsô zwiag bo ywèt tse,

¹⁵mb'a be benntùn kwùt'a be kua' ndùse. mb'a be mènntùn bèn ntùm mbabe.

¹⁶A be z'o ghù nkwate là, o ju' men ntshob li, o kù' ntoṅ num njoṅ ntshob màm fa!

¹⁷Be kua' ngakeban nunetsin tô ké? Ndù o nsi so ntsha tu Nsi z'a be mèn netsine, mbe Nganeta Ntshùate là ké?

¹⁸Nsi num nda'te tshùagntù fenfen bo nukebwô kamkame.

¹⁹Nsi bèn nabte mba we lo. A ke' be ghù tôte num ben ndùbndùb, ke ghù tôte netèt ngaju bo mbwoṅ.

²⁰Mènntùn num nkwù ndende ndù tèttswe'. Nsi num ndab mènntùn ma' nsi, a kwù be ndùse. A num ntèn nganeta ma' nsi yen nà ke bètt'é mo' sàm ngù'.

²¹Nummbe Nsi num njen nzin njoṅ yub fa. Mba we lo num mbe tsho' ku nsi a yen.

²²Sàm dù' nesènte ke netshaṅ njam no ke bwe,

²³A ke tshwèt mbètte Nsi ngelaṅ yàm nelôte mènntùn kà mbe tù kam bo yi.

²⁴Nsi ke' be soṅ mèn ndùs'a ma' dùbdùb nsi là, ke ndùs'a yab tsemo' num dù' tshob lo.

²⁵Nummb'a lèn mfa' mube. A num ma' yub nsi tèttswe', njoṅ nyiaṅte yub nku be ndùse.

²⁶A num ndab yub mbwe njoṅ benntùn fa mba ben kebwô là.

²⁷Nummbe bo tsin, ke bèn netam njam Nsi, ngua' njoṅ manze tse fa.

²⁸Bo lo tènte bwoṅbwoṅ ndù bo kua' ntsiaṅ Nsi, a ju' nkua' mub njwimte yube. Bo lo ghù nkua' bwoṅbwoṅ nèn tà nkum mbaṅ i. Tu wul i lo ju' mba ghayennge' tshwèt ntsham zwe là.

²⁹A be z'a fà fite là, mba we z'a ghù nese' va' nsi à? A be z'a lem se i là, mba we z'a ku'ni neyen i à? A num ngù num ta' ngô mb'a b'a ghù num ta' mènntùn nà.

³⁰Ndùlala ndù kà mèn kebwô bèn nsa'a, mba ndù k'a bèn nebe ywi' num ngô.

³¹Nummb'a ke' to' tshob Nsi ndù: mba ntsha na' ngwù tu àm nà, me ke bèn neghù nukebwô,

³²la't'àm ju ze me ke' yen nà; a be ze me na' ngù nu z'a ke' tsin nà, mba me ke bèn neghù.

³³O ke nke' ntam mvèl à num ju ze Nsi ghù là ké? O kwate mb'o ghù nenànt'é a ghù ju z'o kô là ké? Yen nà lôt'a wù ke b'a me. Soṅ yag mb'o kwate là ndonni.

³⁴Njoṅ ghakwate fa b'a yàm njam. Njoṅ ghazenu fa tse bo ju' ntshob màm nà kwat'a mba me là.

³⁵Yob ke' siaṅte kà ntshobe, ntshob mi bwoṅ nkwate ntùn.

³⁶Laṅt'a ke nke' nse' yi, nummb'a ke mbùnt'a mba ghatshùagntù là.

³⁷A tshwèt nke' nkwi'te nukebwô nswe num mfànnu mi. A tshwèt mbu' mbu mi netèt be. A tshwèt nke nke' ntshob kebwô num Nsi.