Read Medumba Yob 36 Bible Online

Yob 36 - Medumba bible

Yob 36

¹Eliu bèn nèn ntshob mbwe ntshob ndù:

²Na' mfènte metsili, me zi't'o. Me ghù memo' ntshob mi me bèn tshob num ze njam Nsi là.

³Yàm zenu zi, me nsi ghù mba me lèn nà, num nela'te ndù Nsi z'a be Mbom àm nà b'a netsine.

⁴Sàm ju ze me tshob wù là ke b'a tatte. Mèn ze bin yi tshwèt ntshob là b'a nzenu mèn.

⁵Nsi b'a Nganeta num zenu z'a ghù tu i là.

⁶A ke' be faṅ ghaghù nukebwô yôg. A num ngù nunetsin ghayennge' njoṅ ndù fa.

⁷A num nkabte ben netsine. A num nte yub num diaṅkwa boa fenfen, ntùm nkuni mi a tswe matmat là.

⁸Là, a be ze ngô vù ntùm mvèt tùne, nke njen nge' num ju ze bo ghù là,

⁹mba Nsi a' la'te nukebwô tshob boa mfànnu mi bo ghù ntùm ko'tewut là bo.

¹⁰A num ngù bo kù' ntoṅ ndùs'a tshobte yub là, nke ntshob bo ndù bo kù nukebwô.

¹¹A be ze bo ju'u, nju' ntshu Nsi là, mba bo a' miagte lé'njù tshob à ntùm fite, mbe ntùm fu' num miagte ngu'njù tshobe.

¹²Ntag ndùlala mba bo nsi kwù ṅwi, kwù à mba bo femni, mbwoṅ zenu là.

¹³Ben kebwô num njèn wut yub yantù, ke kua' Nsi ndùs'a tshwèt ntaṅ yub tshan nà.

¹⁴Bo ke nkwù à ndùse bo ke' nguanmèn nà, ndù yôg tuswe yà lagni yub tù fa.

¹⁵Là Nsi num ntshu' njennge' ntùm ntobni i, nke ntshùa njam nge' neyen nke nzi't'é.

¹⁶A nsi sô mba wù yu ntùm nge'. A nsi ghù o ta'te wul o, mbe kua' ménla'. Jujù ntùn nsi dun num so téblé.

¹⁷Là, a be z'o tshètte yu njam à mba mèn kebwô là, o lèn ndù nevù ntsha ke nsi tum bwe, mb'o tshwèt ntshètte yu njam nà.

¹⁸Kà yantù lo' o ntsho yi ntùm tshabte. Kà mba ju netshu' o yi z'a zi neshu là ghù o fàn ku o.

¹⁹Be nkua' mu ku'ni nesô o ntùm nge' ké? Mba kua' ngù' ts'o ghù nesô là ku'ni ké?

²⁰Kà tsham zwe tèttswe', ndù ngô ko' nèn num yub dù'.

²¹Zete nekaṅ wul o ndôte nukebwô. Zete nekô nukebwô ntshùa nge' neyene.

²²Tshù, Nsi b'a mèn neta ntùm neta i. A zit ngatswite z'a fut'é à?

²³Sàm mèn ke' ku'ni nesoṅ Nsi mb'a' ghù là, ke bèn nku'ni netshob ndù ju z'a ghù là b'a ze kebwô.

²⁴Lo' mba so fa' là neke nyàmte mfa' mi, mi njoṅ benntùn fa num nyàmte ntùm nkwi mub là.

²⁵Mba zit mèn no num nyàmte mfa' Nsi. Mba we lo ke njen men mfa' l'à ka' ku.

²⁶Nsi zi neshu, mbe ndù be ke' ku'ni nelèn i, ke bèn nku'ni nesiaṅ ngu'njù tse ndèn njoṅ i.

²⁷A num nsoṅ ntàm ntse, ngù a kaṅ ntù' ṅame, a lo' i ngù mbaṅ yi.

²⁸Ba ndot num nsate, ndam nke ndo num benntùn ntàm ntàme.

²⁹We z'a ku'ni nelèn mba ndot be ndo' nsate yi l'à, mba fambaṅ be ndo' mbèt yi ntùm dù'ntswe Nsi z'a tà mfe tù l'à?

³⁰Tshù a num ndo' nelàne nkabte wul i yi. A num ndo' ntse mi a dibantse ndù a yàm nà ngù nzwe nema' tu i yi.

³¹Tshù mb'a num ntsho'te ngô yi là, tshù mb'a be ntshùa kà mfà jujù yàm bo là.

³²A num mem fambaṅ bu i, ntum i a nèn dù' z'a yab ndù i bwe là.

³³A num ndo' fambaṅ mbù nz'é yi, a nke nda'te bwoṅ nyàm mb'a ghebte.