Read Medumba Yob 38 Bible Online

Yob 38 - Medumba bible

Yob 38

¹Ndùlala Tshùaben tswe ntùm fetmbaṅ mbùnte Yob ndù:

²A kua' we z'a tshwèt mfim ntàmtenu màm njam ntshob kagni ndù à?

³Taṅ kob so, mba neta nduku là. Me nsi bètt'o nu, o bùnte me.

⁴O na' mb'a yà ndùse me na' nabte njù l'à? A be z'o lèn nu là o soṅ àm nu bwe.

⁵We z'a na' njab njoṅ ndù tse mb'o a lèn à? We z'a taṅ ndeb bwe nelo' mfi' yi à?

⁶Ntom ts'a ke ntomt'é là ke njé't'a num we? We z'a te ndoṅ tôgndà à?

⁷A na' mb'a ndùse, nsa nkebnjù ke njob nkwi ṅwate, nshumnshum Nsi nke mbu' mbu ntùm tsiaṅte là.

⁸We z'a na' mfùn dibantse boa nzendà tse, ndùs'a tum bam tsha' nke ntèn nèn à?

⁹Me lo fà ndot yi mba nzwe i là, nkul i ntùm njame.

¹⁰Me lo yab yàm ntshù' mbwe i, njab ba kàb, nte ba nzendà mbwe i,

¹¹nke ntshob yi ndù: O nsi zin kum à nsen ni, ke bèn nèn ngùanesà. Be yu ko'tewut mb'o tshwèt ndo' mbùn yi là ke tôg nsen ni.

¹²Yob, fe mb'o be ntùm njù là, o to' tshob mfôgnjù mo' nkebnjù ndù ze dù' tsin à nsen ni ké?

¹³O to' tshob lagnyam ndù a ghom ntôg tsha'a, nyi'te ghatshùagntù ké?

¹⁴Lagnyam be ntume, nda'te mba zit ju lo num nsitsha' bo ntshù mi.

¹⁵A num ntum nta' njam z'a be nshun ghatshùagntù là, mbu mub mi a num mfètte lem nà tshùaṅ.

¹⁶O to' nèn tà nkum dù' dibantse num ntum nà ké? O to' zinte tà nkum tun ghem ké?

¹⁷Tse nzendà vùkob to' gha' mbwe o ké? O to' yen tse nzendà netshaṅ vùkob ké?

¹⁸O tam lag num mba tsha' lo' nzi yi là ké? Tshobe, a be z'o lèn tshen tshu là là.

¹⁹Nze z'a ke nèn dù' nelàn be là b'a yà? Dù'ntswe njam b'a zit dù' à?

²⁰B'o lo' yub mbèn yi num yub dù' ké? O lèn manze la' sob ké?

²¹O lèn à nummbe bo lo bwôg bwe o bo. Lé'njù tsho bèn njàm neshu ké?

²²O nèn tà nkum num fèt nywinmbaṅ ké? O yen dù' ze nywinmbaṅ kùmte là ké?

²³Me lem njoṅ i fa à num ngelaṅ nge'. Num ngelaṅ zwe' bo ngelaṅ ntsho.

²⁴Nelàn ke ngabte ntshùa à zit manz'à? Fetmbaṅ z'a fe ntumnyam nà ke nsa ntôg à yà kà nse' num nsitsha' à?

²⁵We z'a gha' manze mbaṅ, nto manze beba'mbaṅ bo fambaṅ à?

²⁶Mbaṅ be nke ndo num tsha' tse mènntùn ke bwe, num kônkwa dù' ze benntùn ke' be tswe là.

²⁷Mbaṅ be nke nzwi' fam bo dù' njum, nke ngù nenà mbit ntum nsi.

²⁸Mbaṅ ghù tàab ké? We z'a bwe ntàm meme' à?

²⁹Nywinmbaṅ mi a fùn nà tum à bam we? We z'a bwe ṅam z'a be nswe' mfe kamànyam à?

³⁰We z'a ke ndo' ntse nkaṅ loṅ yi à? We z'a ke ngù num dibantse fùn ntù' loṅ à?

³¹O ku'ni netamte ba pliade nkut ké? A wù bèn nke nké'te Orion ké?

³²A wù bèn nke ngù nsa ntum num kua' yub ngelaṅ ké? A wù bèn nke ntshagte urs ndùb boa tse nke' ké?

³³O lèn mba nkàn kamànyam be yi là ké, nku'ni nela'te yub mba bo nsi zin yi num nsitsha' là ké?

³⁴O ku'ni nefà nz'o tù ntùm ba ndot, ndù bo lo' mbaṅ yub ndo o yi ké?

³⁵B'o ghù mbeba'mbaṅ se', nkum mbaṅ o ntshob ndù: Tshù bag li, tum yag ké?

³⁶We z'a soṅ saṅ bo ke ngamt'é ndù ta'ntse Nil nsi dun à? we z'a soṅ tutu ndù mbaṅ a' lo à?

³⁷We z'a ze nu tà, kà nku'ni nesiaṅ ba ndot, mben yub nsi mbaṅ lo,

³⁸ndùse mbab fùne, ntù' ntù'ntù' mba tsha' neta l'à?

³⁹A wù bèn nke ngom ze mbàb nzwi ngwayit, A wù bèn nke nkém bon ngwayit,

⁴⁰ndùse bo nô ntùm ntô tshobe, ndùse bo kab ntùm ngab yub nke nya' ju là ké?

⁴¹We ke nkém mala, ndùse bon tse tshwèt nkua' ntsiaṅ Nsi, nke ntsha nèn bag bag mba jujù bwoṅ bo l'à?