Read Medumba Yob 39 Bible Online

Yob 39 - Medumba bible

Yob 39

¹O lèn ngelaṅ mbwe tshwèt num mbwe là ké? O to' yen ngelaṅ kwinyàm bwe là ké?

²B'o lèn njoṅ ṅwù ts'a be nket jùm nà ké? Ndèn ngelaṅ z'a num mbwe là ké?

³Bo num nô nsi, mbwe bon tshobe, Nsi tshu' yub ntùm ntobni yub.

⁴Bon tshob num nku'u, nta be tshwèt, ndo mbaṅ mà tshob nèn ngùanesà ke bèn nebèn njam mbaṅ bo.

⁵We z'a num ngù kekwèn tshwèt be ze tu, ke bam ndù sàm ju tshètt'é à?

⁶Me fà ze dù'ntswe num kônkwa, mfà dù' tsha' ngwa yi mba ze ndà là.

⁷A num nzwi tse tshu'te z'a be ntùm ba ntusô là, ke be ju' tse mba tàfa' ṅag kam nà.

⁸A num nzinte num ba mbat nke ndiag nenà, nke ndiag mba tsit nenà lo tse a be tse fi là fèle.

⁹Be nyatnyàm fa' wù ké? B'a zi ntùm so kin num ta' tèttswe' ké?

¹⁰B'o taṅ i mvèt, ndù a dù' nà ké? A ghù neke mbwe njam o num neke ntshu'te nkeb tsha' ntùm tômbo' ké?

¹¹B'o yé'te num i mb'a ghù neta yàm nà ké? B'o fà mu mfa' yi ndù a fa' wù ké?

¹²B'a tsho' tshu wù nket mfe yi tshwèt ké? B'a ket tshu naṅ wù num dù' netsham nsa ké?

¹³Saṅ mbwe num mbu' mbab mi ntùm ṅwate, là mbàb mi boa mfe mi ke be mi netshètte bon yi mba mi ngab là.

¹⁴Nummb'a num ngua' mbum mi num tsha'a, mfaṅ mbum nke nke' num nkwa.

¹⁵A num ndag mbe nku ghù nenywiaṅ mbum nà, ndag mbe nyàm tshwèt ghù netsitte men mbum nà.

¹⁶A num ma'ni bon tse k'o ke lèn ndù a bèn ngù yube. A ke' be tshàm neke njen nge' banban.

¹⁷A b'a nummbe me Nsi lo nyam i zenu, ke fà nesiaṅte yi mba memo' nsaṅ nà.

¹⁸A num mbe ndùs'a nabte wul i nekù nde là, a zwi tse nyàmdiaṅ bo ngako' nyàm.

¹⁹Yob, a b'a wù bèn nke mfà yen neta là nyàmdiaṅ ké? A b'a wù bèn nte nyiaṅ ts'a be num kekol i là bwe ké?

²⁰A wù bèn nke ngù a mbùn mba ngamntàn nà ké? Ze nekua' num nkag bwôg.

²¹A num ndo' nku mi ntoṅ dù' yi, ntsiaṅte num neta i. A num nèn mbwe ntshu ntsho ntùm ṅwate.

²²A num ngwag bwôg, ke ke mbwôg sàm ju. A ke' be bèn tuntun mbwe ṅwi.

²³Mfe' nkét num nke mbu' mvèn i. Kô bo kô nja' be nke nziag num i.

²⁴A num mbùne, nke ntshù' dù', nke nja' nkônga. A num nju' nta ntsho netshùb i ke bèn mbe.

²⁵A num nkua' ndùs'a yoṅ nju' nta ntsho là. A be njen ntsho ngùanesà, nju' nkua' tàndà ntsho boa tshu'te ghama' ntsho.

²⁶A ke ntshùa njam yu zenu kà bebabsa' nke mfùle, nsate mbàb mi ntshag nze mà ntèn ké?

²⁷Ghammàtat ke ndo à mb'o tshobe, kà nèn nte nkàn i tshaṅ tù ké?

²⁸A ke ntswe à num tshaṅ ngondoṅ, dù' tse be mènntùn ke kum bwe là.

²⁹A num ntsin bwe nke nya' ju z'a ghom nà, nke njen ju là tà ngùanesà.

³⁰Bon tse num nu lem neshu. A num nèn mba yà lo dù' ze fe tshu be bwe là.