Read Medumba Yob 40 Bible Online

Yob 40 - Medumba bible

Yob 40

¹Nsi bèn ndo' ntshobe, mbètte Yob ndù:

²wù ngata ntshu, o ku'ni nesa' ntsha bin Nsi ké? Nsi num mfà bùn ntshob mèn yen nà z'a tshwèt nta tu mbwe i là ké?

³Yob bùnte Tshùaben ndù:

⁴yen àm njene, me ke' ku' sàm ju mba metsili, ke ze me ku'ni nebùnte wù à? Me mem ntshu àm, mi ntswe.

⁵Me yà tshob yoṅ ntshù', me ke nsi bèn bùnte. Mba num mbatte yoṅ bàa, me ke bèn ntshob sàm ju.

⁶Tshùaben tsin ntùm fetmbaṅ mbùnte ntshob Yob ndù:

⁷taṅ kob tun o mba kua' neta mandum nà. M'a' bètt'o nu, o bùnte me.

⁸O ke nkagtùn nela't'a mbe me b'a mèn z'a ke' tsin nà ké? O ke naṅ à ntsha tu àm, nke ndo' tu wul o mba mèn netsin nà ké?

⁹O ghù bu neta mba bu Nsi là ké? Be yu nze tshu' ntùm bwe mba yàm nà ké?

¹⁰Kwi wul o ntùm nkuni bo nyàmte. Ma' ka'te bo ghamte num o mba nzwe là.

¹¹Sa tonte yantù o, tam lag num ghako'tewut, nkôg yube.

¹²Tam lag num ghako'tewut, ma' yub nsi te ku tu ghatshùagntù be kua' dù' i.

¹³So njoṅ yub fa ntùm mbabe. So se tshob ntùm ngô netshaṅ vùkob.

¹⁴A be ndùlala mba mba tu wul àm nsi nyàmt'o, mb'o yob ngu' njam neta bu o ze zwim nà.

¹⁵Lôte dingwa njene. Me lo nabt'é mba me na' nabte tu wul o là. A num mfèt nenà mba nyàmna' là.

¹⁶Tshù là, ze neta b'a ntùm zwe' i, ze ngù' be ntùm tshu bam tse.

¹⁷A num mbù' nkun i tù mba sédra là, nga ts'a be num mfat mi là kù' mfa fafa.

¹⁸Mvôg mi ke nta à mba mbwoṅ tùn fôgtab là. Mvôg nka' mvèn mi b'a mba mbwoṅ tùn meba là.

¹⁹A b'a mbwe fa' netèt mfa' Nsi fa. Mèn z'a nabt'é là lo fà ṅwi yi.

²⁰A num mfon ze jujù num ba mbale, dù' ze njoṅ nyàm tshwèt fa num ntam ngùa bwe là.

²¹A num nô nsi bam netshaṅ ntù sàb, netèt nka'nesoṅ boa ntshe'.

²²Ntù sàb be nkabt'é netshaṅ yub. A num mbum bam ba tsinkém tse bo be mbaṅ fub là.

²³Ke ta'ntse dun ntum be num koṅ i là mb'a ke nsi kùù. Ke ta'ntse Yordan tsho be ntshu i lo mb'a' tswe ndù kam.

²⁴Be mèn ghom i se se ké? Be mèn lo' lub nto ntselag i yi nso mvèt bwe ké?

²⁵B'o lo' lub ngom ngànyàm yi ké? B'o lo' mvèt nso num lém se ké?

²⁶B'o lo' kôg nto mfaṅ ntselag tse yi ké? B'o lo' tùn s'a ṅu' là nto ngagntshu i yi ké?

²⁷B'a labt'o à nelabte ké? B'a tshob nu wù à ntùm nze nebotte ké?

²⁸Be bin yi wat kàn ké? B'a bam netù' nkuan o matmat ké?

²⁹Be bin yi ghù sa mba saṅ nà ké? B'o kul i ndo' nke ntshegte ngonngon tsho yi ké?

³⁰Ghaghom ngontse be nswèn ngànyàm ké? bo num ngabt'é netèt ghatantàn ké?

³¹B'o lo' tùn nebéte nsob ngub i yi ké? B'o lo' ghub tùn ngom tu i yi ké?

³²Yab nda' bu o num i: a be z'o zete nekam i là, mb'o ke zi bèn nto'te mo' yoṅ i.