Read Medumba Yob 41 Bible Online

Yob 41 - Medumba bible

Yob 41

¹Lôte njene! O num nke ndiag neghom i, njen i, nu neghom i mi ntù o.

²We ze b'a bà nèn kamt'é à? mbèn mbe, we ze b'a bà nta tu mbwe àm à?

³We ze njo i be bam àm, me ba' yi à? tshu fa ts'a tun bam kamànyam nà b'a tshàm.

⁴M'a' tshob nu mba num nkam ngànyàm, ntshob nu num bwô i, mba num mb'a lo' mbe yi là.

⁵We z'a to' bù' nga' mi à? We z'a to' tshag bu mfé' nsô mi à?

⁶We z'a nsi gha' nkub ntshu mi mi a be mba ghabndà l'à? Nsô mi mi a tete njam bwe là num nkag bwôg.

⁷Nga' mi b'a mba ntshètntsho là, mbwô mbèn nta neshu, ndù bo latte netèt bo kua' mb'a ku'ni là.

⁸Bo num ndatte netèt bo kà mba kua' mfùag ke ghù netôg netèt bwe.

⁹Bo b'a mba fètfèt tse bo tate, mèn ghom mèn, ke bèn nkô nefiag wut tshob là.

¹⁰A num ntswiag mba nka' nsi tum bwe ké'é. Miag mi b'a mba nkub miag mfôgnjù là.

¹¹Ba lambwôg be ntum ntshu i, nsa mbwôg nke ntume.

¹²Nzembwôg num ntum ntùm mfaṅ ntselag mi, mb'a b'a ta' kab z'a be num mbwôg z'a tshwèt nkù neshu là.

¹³Zwiag se be nte mbwôg num nkekimbwôge. Lambwôg num ntum ntshu i.

¹⁴Neta ke ntswe à ntùm kekol i, bwôg nke nzin à mbwe i.

¹⁵Dù' wul i tse mbàb yàm bwe là ke ntam à ntsha', ndat num i kà sàm ju ke ku'ni nenyi't'é.

¹⁶Ntù i ta à mba loṅ nà, nta à mba loṅ dù' negho' ngefet là.

¹⁷A num ndo nsi ben neta nke mvètte, bwôg kôgte nku mube.

¹⁸Ṅwi ke' ghù neywimte mèn sàm ju ndùs'a ghebte mbaṅ i là, ke kô lo, ke tùn nebéte, ke tshètntsho lo.

¹⁹Tùn ke mfut'a ntshwèn z'a bi là num ze tu. Fe meba be ndaṅndaṅ.

²⁰Két ke' ku'ni neghù a kù. Loṅ shùmte ke ntswe yi à mba bén nà.

²¹A ke njen zwil à mba ntàn nyi'nga là, nke nzwi tse ndùse mèn sob i tùn nebéte là.

²²Njônjô num tun bam i, k'a tswe à mba nsô sofa' masin nedù' nà yi ze bo yab num tsha' là.

²³A num ngù bam dibantse nke mbùn mba tshaṅ se bo te mbwôg là. A num ntshù' i à mba ndô ze labinda dun ntùm bwe là.

²⁴A num mbe zin mfaṅ bwoṅ nka' njam i, kà mb'a be mèn tshob ndù nyiaṅtu fôgtab bèn nkabte num dibantse là.

²⁵Sàm mèn ke num tsha' z'a be ntô i là. Bo lo nabt'é ndù k'a bwôg sàm ju.

²⁶A be ndo' a wag ndôte mba ke lo z'a sag là yi. A b'a mfen netèt njoṅ nyàm fa tse bo num mfit là.