Read Medumba Yob 42 Bible Online

Yob 42 - Medumba bible

Yob 42

¹Ndùlala Yob bùnte ntshob Tshùaben ndù:

²Tshùaben, me lèn ndù o ghù mba' neghù njoṅ i fa, mba ndù o ku'ni neghù mba ke lo z'o kô là.

³Wù Tshùaben lo bètte ndù: A we z'a be mbabun nke nkag njam num ntàmtenu màm ndù à? Tshù, a b'a me Yob bèn mbe nkagni. A mba wù Tshùaben bètte là. A b'a kua' nenùn mbe zenu ke me. Tshen tshu là kuni mbwe àm neshu. Me lo ke lèn yub tshàm.

⁴O lo tshob me ndù me ju' ngelaṅ z'o tshwèt ntshob là, nkag tùn nebùnte mb'o bètte là.

⁵Ntoṅ màm lo ke nju' mba bo tshob nu mfà num o là. Là ndonni kua' miag màm bèn njen o.

⁶A ndùlala, tuswe ko àm, me kaṅ ntù àm, nô ntùm mbab bo bwembwôge.

⁷Ndùse Tshùaben miagte netshob men ntshob là fa Yob là, a tshob Elifaz ze Téman ndù: yantù àm kam num o mba num shun tsho bàa, nummbe bin lo ke tshob nunenùn num àm mba ngafa' àm Yob na' ntshob là.

⁸Ndonni a bwô ndù bin lo' mfot mfô sammbàa boa nkomnjù sammbàa, nèn mbwe ngafa' àm Yob, nton yub mba jule'te là num zin tu wut. Yob ngafa' àm a' le't'àm num tu bin. A nsi tshùa njam i kà me be ke yab nge' num bin à ndaṅndaṅ mba bà zin be yi là. Nummbe bin lo ke tshob nunenùn num àm mba ngafa' àm Yob na' ntshob là.

⁹Elifaz ze Téman, Bildad ze Shuash bo Tsofar ze Naama nèn ngù ndaṅndaṅ mba Tshùaben tshob bo là.

¹⁰Tshùaben ghù Yob bèn mbe mb'a na' nto' be là, ndùs'a le'te Nsi num tu shun tse là. Tshùaben bèn mfà tshu yi njoṅ ts'a na' mbe là yoṅ tse bàa.

¹¹Fèt Yob tse bandum boa tse bènnzwi, ywèn shun tse nèn njoṅ yub fa ndôt'é, njù boa bo ntùm ndà i. Bo tshàm i, mfite ntù i njoṅ yub fa num njoṅ nge' fa tse Tshùaben ghù a tsho num i là. Mba zit mèn no fà meju nkàb bo ta' kwa gol yi.

¹²Yob lo be miagte ngu'njù tse, Tshùaben tam ntse yi, ntshùa mb'a na' ntam yi tà mbwe là. A ghù mbwe ntsha' ntshob kuà gham, kamél ntsha' ntôge, nyàmna' ntsha' bàa, kekwèn ntsha' mbùm.

¹³A ghù bonnshum ntu sammbàa boa ngonngon ntu tat.

¹⁴A tswi lén ze mbwe ndù Yémina, ntswi lén mbatte bàa ndù Kétsia, ntswi lén mbatte tat ndù Kéren-Happuk.

¹⁵Sàm mènnzwi lo ke be ntùm ngô z'a na' mbwô mba ngonngon Yob là. Tà yub bam ndù boa fèt tshob tse bandum ghabte ntsi'i.

¹⁶Yob bèn ntswe ntùm njù ngu'njù bon kuà nkù, njen nshumnshum tse nshumnshum, tà nèn nkum zwiaṅ kuà.

¹⁷Yob be kwù njwèn neshu, ngu'njù tse yàm nga' mbu.