Read Medumba Yob 6 Bible Online

Yob 6 - Medumba bible

Yob 6

¹Yob bùnte ntshob Elifaz ndù:

²Wé! A lo mbe ndù be bo fi' nge' àm, a lo mbe ndù be bo yab njoṅ nge' tshàm fa num kilô,

³mb'a be bo lèt ntshùa nkwango' mi a dibantse là. Tshù ju z'a ghù ntshob màm nèn tà mfute mi mbabun nà.

⁴Nummbe nkét Nganeta Ntshùate lo tot'àm, tsheb s'a be ntshu bwe là nèn ntù àm. Tshùagntù Nsi ts'a yàm nà kùmte nkam àm ntsho.

⁵Kekwèn tshwèt ghù neke nkua' mbaṅ ntemntem nenà ze bo ma' yi là ké? Nyàmna' num nkua' ngelaṅ z'a ghù jujù là ké?

⁶Be mèn jù ju z'a ghage, ke ghù ngwa là ké? Dù' mbum ngab z'a fôg là num mbwô ntshu mèn ké?

⁷Ju ze me ke' kô nekwag là bèn ntù' be yàm jujù, k'a bag ntshu àm mba ndùke lo.

⁸Be we ghù yàm nekô bumt'à? A bwô ndù Nsi ghù yàm nenywinte vù lag!

⁹A be z'a bwô Nsi à nebiagt'àm nà, a tshag bu i miagt'àm yi.

¹⁰Ta' fitentù nsi tswe tù' me. Ta' tsiaṅte nsi tù' ntùm nge' ts'o lo' ntsho àm yi là: Me lo ke to' fàn tshàm ntshù' Mèn Nelàne.

¹¹Me nsi ke nywinte ndùse neta ke' bèn nebe me l'a numke? M'a' bèn nke mbéb ndùse yàm nu à mi l'a numke?

¹²Yàm neta b'a neta loṅ ké? Wul àm b'a ntùn ké?

¹³Me ke' b'a mbu ndaṅ ké? Yôg ke' b'a tà ngùanesà mbaṅ àm ké?

¹⁴Mèn ke njen nge' mb'a be nshun i ko ndèn mi tag ndùlala, mb'a ke be bwôg Nganeta Ntshùate.

¹⁵Bin fèt tshàm b'a ghamfùm mba ta' ntsitmbaṅ nà, mba fub ba ntsit mbaṅ mi a be mbi nsi là.

¹⁶Ba nywinmbaṅ num nzwiaṅte koṅ i, nywinmbaṅ se ka ntùm bwe;

¹⁷yen ngelaṅ nà ba dù' nedum se', ngù a jum, ba mbwôg nyam se', koṅ i tù' b'a nejumte.

¹⁸Bwoṅ benntùn tse bo tshwèt nèn nkatte là num nkag yub manze, ntsho num kônkwa mbite fa.

¹⁹Bwoṅ ba Téma tse bo tshwèt nèn nkatte là te lag bwe. Tse ghakatte ba Séba dun nenywinte.

²⁰Tuswe ko yube, nummbe bo lo yab ntù yub bwe. Tuswe ghom yub ndùse bo zin nkum nà.

²¹A ndùlala, bin b'a mba bin ke' bèn mbe là. Bin tshwèt njen nge' àm nke mbwôge.

²²Me to' tshob bin ndù bin fà ju me, ndù bin lo' tshu tsin mfà ba nda' yi num tu àm,

²³ndù bin tshu' àm bu ngakeban, ndù bin jun tu àm bu ghatshùagntù ké?

²⁴Bin tagt'àm m'a' mi ntswe. Bin soṅ àm ju ze me fàn nà.

²⁵Mi' ntshob nenùn num nkôgte mèn! Là bin, zin netshobte ke nda't'à ke?

²⁶Bin ke ntshobt'a num ju ze me tshob là ké? Bin ke njen a fute ntshob mèn z'a ke tshwèt mbèn nenywinte sàm ju là ké?

²⁷Bin tshwèt ma'ni ménntse, nke ntsho' nku nshun zin kebàn.

²⁸Me le'te zine, bin lôt'àm njene. Be me tatte zin se se ké?

²⁹Bin bèn njam, kà bin be ben ketsin. Bin bèn njam, bin lèn ndù me b'a mbu'u.

³⁰Me lo' lém sàm mfàn nu yi ké? Ntshu àm ke' zete num nukebwô ké?