Read Medumba Yob 7 Bible Online

Yob 7 - Medumba bible

Yob 7

¹Yôg mènntùn num nsitsha' b'a mba se ta' soyé là. Lé'njù tse b'a mba tse ngafa' fa' là.

²Ta' nkuan be ntsham zwe ndùs'a yen netshaṅ ṅwag là, ngafa' nke mbéb ze nkàbfa'.

³Yàm bag i ze me ghù là b'a neyen nge' njoṅ maṅwù fa. Yàm ju tsi' ze me ghù là b'a nge' neyen njoṅ tèttswe' fa.

⁴Me num nô nsi, nke ntshob ndù: Njù nsi làn à ndùke, me nsi lo nsi à ndùke? Me num nzwete tà nkum nkebnjù.

⁵Mbé' dun ntùm wul àm, nga'nga' bèn ndo' wul àm fa. Ngub àm tshwèt nkebte nke ntsho' ngwù nsi.

⁶Lé'njù tshàm ke nèn ndende à mba ṅwi bàm ngaba' bàm nà. Lé'njù tshàm num mbi nsi, yen ngelaṅ nà nenywinte ke bèn mbe.

⁷Nsi, kwimte ndù yôg sàm b'a ta' mfùag. Miag màm ke nsi bèn yen fu'.

⁸Lag so s'a te num àm nà ke nsi bèn lôt'àm. Lag so nsi diag àm ke bèn neyen àm.

⁹Ndaṅndaṅ mba ndot be nsate mbi nsi là, be ndaṅndaṅ mèn z'a swe' ngô fe ben nà ke nsi bèn njam.

¹⁰A ke nsi bèn bèn njam ntùm ndà i, dù' z'a na' nke ntswe bwe là ke nsi bèn lèn i.

¹¹A ndùlala me ke nsi tshùb ntshu àm, me nsi tsin ntùm nge' z'a ntù àm nà tshob nu. Me nsi ma' njom wut màm num zwe z'a ntù àm nà.

¹²Me b'a ta' dibantse ke ta' nganyàm no ké? K'o nte ghabéb dù' ndam àm yi mbum à?

¹³Me num ntshob ndù: Kunndà sàm a' bù't'àm, yàm dù' nô kôgte ba ya tshàm,

¹⁴yen ngelaṅ nà o lo' ba njem nke nkag bwôg yi num àm, ndo' ba njem nke nkag fétwut yi num àm.

¹⁵Ah! Me kô ndù bo nyu' ntô màm! Me kô à nekwù ntshùa neke' ntùm men mvôg li!

¹⁶Me wag yube! Me ke nsi yôg à matmat. Faṅ àm nà, nummbe yôg sàm b'a nda' ta' ywèle.

¹⁷Mènntùn b'a ke k'o nke ndèn njoṅ i ndù à, k'o nke nket lèt num i ndù à,

¹⁸k'o nke nse' ndôt'é njoṅ nkebnjù fa, k'o nke ndaṅt'é njoṅ ngelaṅ fa ndù à?

¹⁹O nsi tsho' lag so num àm à ndùke? O nsi faṅ me mi ntsi à num zit ngelaṅ à?

²⁰Ngabéb benntùn, a be ze me ghù nukebwô là, mba ze me ghù wù b'a ke? Numk'o tsho' àm ndo' ngù ju nelaṅ yi num nto' tsho à? Numke yàm lèt ntù' ke njét'a mbe' àm tù' m'à?

²¹Numk'o ke lagte nukebwô àm à? Numk'o ke lagte mfànnu màm à? Nummbe me nsi nô ntùm mbabe. O nsi diag àm, me be ke bèn mbe.