Read Medumba Yob 9 Bible Online

Yob 9 - Medumba bible

Yob 9

¹Yob bùnte ntshob Bildad.

²Ṅ, me lèn ndù a b'a kua' ndùlala. Be mènntùn tum mèn netsin mbwe Nsi à ndùke?

³A be z'a kô neta ntshu bo yi là, mb'a ke bùnte ta' nu yi ntshù' num nu ntsha' mbùm.

⁴Nsi b'a nzenu, mbe Nganeta Ntshùate, kà ndù mènntùn ke' ghù nebù' tu i nsi num nu, nu ke tsho i.

⁵A num nket ba mbat nsi ndende tà bo ke kumte, ntèn yub ntam nsi ntùm yantù i.

⁶A num nyi'te tsha' tà ntùm tun i, ngù ntom tse nke mvètte.

⁷Nsi num ntshèt lagnyam ke bam a tum, nke nkabte ba nsa ndù kà bo ké' tèttswe'.

⁸Nsi na' nké'te, kamànyam à kua' tù' i. A num nzin mfe num ba tshaṅ dibantse.

⁹A lo nabte mà sa ndùb lén se urs bo orion boa pliade, mba ba nsa mi a be ntèn nà.

¹⁰A num ngù tshu ndùbndùb tse mèn ke' ghù nelèn ntun mi là, nke ngù tshu nekuni ke ndù i.

¹¹Nsi num tôg mbaṅ àm me ke yen i. A num ntse wul i num àm, me ke te lag num i.

¹²A be z'a tsho' là mba we z'a nsi tshètt'é à? We z'a nsi bètt'é ndù: Z'o ghù b'a ke?

¹³Nsi ke' be sô yantù i. A num ntsham ku tu ghakeban tse. Njoṅ ghako'tewut fa tse bo num nta tu là be ngwù nsi mbwe i.

¹⁴Mba me là, me nsi bùnte yi à ndùke? Me nsi tsho' à mit ntshob à?

¹⁵Me lo mbe be mbu'u, mba ju z'a bwô ndù me ghù là b'a nema' mbu Nsi z'a be yàm mba'sa' là.

¹⁶A lo nju' be le't'àm, me tsiaṅ be lén se, mba me ke' kwate ndù a' ju' nz'àm.

¹⁷Tu wul i be nkab mbu num àm à mba ta' fetmbaṅ nà. A tshwèt nkwi'te mfaṅ num àm ke ntun.

¹⁸A ke' be faṅ me zwiag. A num ngù me dun zwe.

¹⁹Me lo ndo' neta, mb'a b'a Nganeta Ntshùate. Me lo mbot'é ndà ntsha mba we z'a nsi tsho't'é à?

²⁰Me tum be mèn netsin mba ntshu àm nsi so àm kame. Me tum be mbu' mba ntshu àm nsi yab àm njo.

²¹Mbu' ké! Me b'a kua' yi. Là, me ke' lo' yôg mba sàm ju là. Me ke' yen yàm nebe mba sàm ju là.

²²Mba ntsha be bwe, me tshob yàm ndùlala. Nsi bagte mbu' bo ngavù ntsha.

²³A num mbe ndùse mbu' kwù ndende là Nsi zwi tse.

²⁴Nsi ma' nsitsha' ntùm mbu ghatshùagntù. A ghù ghatsho'te tù' ba mfùmiag. A be z'a ke' b'a yi là mb'a b'a we?

²⁵Lé'njù tshàm ke nkù nde à mba ṅwa'ni nku nde là. Bo tshwèt nkù, ke be ndù bo yoṅ njen fu'.

²⁶Lé'njù tshàm ke ntshùa à mba sitima nkewakob là, ntshùa mba sa'mbu' z'a tshwèt nswe' ghom ju là.

²⁷A be ze me tshob ndù: M'a' lag nge' tshàm, m'a' faṅ nenywin nsi, ndo' fènntù là,

²⁸mba njoṅ tshàm ntobni fa nsi kag bwôg num àm. Me lèn ndù mb'o ke nsi yen àm mba mbu' là.

²⁹Me lèn ndù m'a' vù ntsha. Me yôg mbèn nke ndab wul àm banban a numke?

³⁰Me lo nsôg wul àm be ntùm nywin mbaṅ, nsôg mbu màm be ntùm tshèn,

³¹mb'o nsi nyu' àm ntùm netob, yen ngelaṅ nà nu tshàm to' nebag nzwe tshàm.

³²Nsi lo mb'a mènntùn mb'a be me bùnte yi, mb'a be bag yi nèn ndà ntsha num nunetsine.

³³Ngayab kam ke netèt bag. Ngatsho't'àm bag Nsi ke' tum tse.

³⁴Nsi àm bù' shua' so num àm. A bwô ndù bwôg ts'o ghom àm yi là tsine.

³⁵Là me nsi tshob nu yi ke bwôg. Ntag ndùlala mba me ke bèn mb'a me.