Read Medumba Yobkwi 102 Bible Online

Yobkwi 102 - Medumba bible

Yobkwi 102

¹Le'te ngayennge', ngelaṅ nu fél i, a ma' mi njom mbwe Tshùaben nà.

²Tshùaben, ju' le't'àm, nju' nkua' màm a se' tà nkum mbaṅ o!

³Kà lem àm se o mum lé'njù nge' sàm. Ben toṅ o num àm ngelaṅ me kua' wù là. Nànte nju' nkua' màm!

⁴Nummbe lé'njù tshàm ke mit'a mba nzembwôg là, mvôg màm nke nkù mba nesèn mbwôg là.

⁵Bo lab ntù àm, a nke njum mba nenà là. Me be ndagte nejù mba yàm bàn.

⁶Njoṅ tshàm nezwiag fa ta neshu kà mvôg màm nke ndat num mbàb wul àm.

⁷Me b'a mba ntshum z'a be kônkwa là, mba bwe' z'a be ntùm fam nà.

⁸Me ke' bèn ngù miaglo, mbe mba nkwi saṅ z'a be num tu ba' là.

⁹Ghakeban tshàm be ntshabt'àm njoṅ lé'njù fa. Ghabatt'àm be nso ndon tu àm.

¹⁰Me ke njù à bwembwôg ndùs'a lo mbwô ndù me jù bàn nà, nke mbwete ntsenyà màm yàm ju nenu,

¹¹mbwe yantù o mba tshùagntù o, nummb'o lo tsho' àm, ngua' àm.

¹²Lé'njù tshàm b'a mba netshaṅ ngelaṅ a tshwèt mite là, tu wul àm be mba nenà z'a tshwèt njum nà.

¹³Là wù Tshùaben be nsa' njù matmat; yu nekwimte nke ntswe ngu'ngu'.

¹⁴O nsi lo nsi, o nsi ko ndèn Sion, nummb'a b'a ngelaṅ neko ndèn mi, ngelaṅ ze bo na' njab là ku'u.

¹⁵Nummbe ghafa' tsho be nkô ndoṅ mi, nke nko ndèn mbab mi.

¹⁶Ngôngô nsi bwôg lén Tshùaben, njoṅ fenfen fa nsitsha' bwôg nkuni mu;

¹⁷ngelaṅ Tshùaben a' bèn kut Sion nà, a nsi ṅwag bwe mum nkuni mi.

¹⁸A nsi kaṅ wul i ju' le'te ben tse bo ghua' yub là, ke bèn newag le'te yub.

¹⁹Bo kite yen nà num zwiaṅ mèn z'a nsi se' là, ndù nzwit mèn nswe nyàmte Tshùaben.

²⁰A ben wul i nsi mfe mum dù' ze nelàne; Tshùaben tsin mfe kamànyam ndôte num nsitsha'a.

²¹Num neju' nzi' kuan ntsho. Num netshu' ben tse bo nsi kwù là.

²²Ndùlala ndù bo tshob lén Tshùaben mà Sion mba ghamt'é mà Yérusalém,

²³ngelaṅ ngôngô boa nufen nzenze nsi tamte fà ghamte Tshùaben nà.

²⁴A kôgte neta àm num manze. A sébte lé'njù tshàm.

²⁵Me tshob ndù: Nsi àm, kà sô àm netèt lé'njù tshàm! Ngu'njù tsho ke ntswe à matmat!

²⁶A lo be mbwe o nabte tsha'a. Kamànyam b'a fa' se bu o bèn mfa' là.

²⁷Bo nsi bi, tu wul o ghô matmat. Bo nsi ywèn njoṅ yub fa mba nzwe là. O nsi bate yub mba nzwe, là, bo nsi bate.

²⁸Là tu wul o, o ke mba be mal i. Ngu'njù tsho ke nsi mi tse.

²⁹Bon ghafa' tsho tse bandum nsi ghù dù'ntswe mum ngô yube. Nzwit yub nsi ghô mbwe o.