Read Medumba Yobkwi 103 Bible Online

Yobkwi 103 - Medumba bible

Yobkwi 103

¹Yobkwi David. Ntù àm, ghamte Tshùaben. A bwô ndù njoṅ ntù àm fa ghamte lén se se nelàne.

²Ntù àm, ghamte Tshùaben, kà lagte sàm numebwô tse.

³Yi z'a be ndagte njoṅ nukebwô tsho fa, yi z'a be njate njoṅ ngokèt tsho fa là.

⁴Yi z'a be ntshu' yôg so mum gheme, yi z'a be mfim o bwôntù mba kondèn nà,

⁵yi z'a be ngù o nke njôg ntùm fu' là; ndaṅndaṅ mba fé'mbé' là, so yôg nshum ke mb'a be nswenswe.

⁶Tshùaben be ngù nunetsine, ngù nu ndaṅndaṅ njoṅ benntùn fa tse bo be ngùtni yub là.

⁷A lo ghù Mosé lèn nze tse, ngù bon Israél lèn mfa' mi mi ndùb.

⁸Tshùaben b'a fitemèn mbe ngakondèn, nke ndèt wut num yantù, mbe ngakondèn.

⁹A ke' be ta ntshu ke ndù i, a ke' be lôte nukebwô be kà ngù nu num be,

¹⁰a ke' be lôte mfànnu be kà mbùnte nu be.

¹¹Nummbe, ndaṅndaṅ mba kamànyam sag nèn ngùanesà num tsha' là, kondèn i b'a be ndùlala num tsha' là,

¹²Ndaṅndaṅ mba ntumnyam nèn ngùanesà num bag mbinyam nà, a be ntshag mi be mfànnu ngùanesà be ndaṅndaṅ.

¹³Ndaṅndaṅ mba tà be nko ndèn bon tse là, be ndaṅndaṅ Tshùaben be nko ndèn ben tse bo num mbwôg i là.

¹⁴A lèn ju z'a nabte be yi là, a kwimte ndù be b'a mbabe.

¹⁵Mènntùn! Lé'njù tse b'a mba nenà là, a be nte' mba nsàm nenà fèn nà,

¹⁶a be ze metsit befet tshùa num i là, mb'a ke bèn nebe, mba dù' z'a lo mbe là ke zi mbèn njen i.

¹⁷Là bwôntù Tshùaben num ben tse bo be mbwôg i là, njoṅ ndù fa. Nunetsin ke be mi num bon mba bon bon tshobe,

¹⁸num ben tse bo be nze kàn se, nke nkwimte ntag mi, nke ngù njoṅ i fa bumte là.

¹⁹Tshùaben te ko'fen se mfe kamànyam, nufen i nke ntô njoṅ i fa.

²⁰Bin ghamte Tshùaben, bin Angél tse, bin ghatshùa ntsho tse neta, tse bin be nke ngù tshu ts'a tshobe, ndùse bin ju' fin ntshob mi là.

²¹Bin ghamte Tshùaben, bin njoṅ tse ntshu ntsho fa, tse bin be mum fa' se, tse bin be nzwiagte njoṅ tse nekô fa là.

²²Bin ghamte Tshùaben, bin tse bin b'a mfa' mi, mum njoṅ dù' fa tse ze netô kum bwe là. Ntù àm, ghamte Tshùaben!