Read Medumba Yobkwi 105 Bible Online

Yobkwi 105 - Medumba bible

Yobkwi 105

¹Bin ghamte Tshùaben, bin tsiaṅ lén se! Bin ghù ngôngô lèn màmà mfa' mi,

²Bin yob kwi, bin yob i, bin bu' bon tshu yi, bin siaṅte nu num njoṅ mfa' mi mi nekuni fa.

³Bin ta' nsoṅ num lén se se nelàne. A bwô ndù ntù ben tse bo be ndiag Tshùaben nà tsiaṅte.

⁴Bin ke ndiag Tshùaben mba ngù' i, bin ke ndiag se i njoṅ ndù fa.

⁵Bin ke nkwimte mfa' nekuni mi a mfa' là, bin ke nkwimte tshu netshàm mba tsho'te ntsha ts'a tum ntshu i là,

⁶bin nzwit Abraham ngafa' i, bon Yakob, ben tse ts'a tsho' yub là.

⁷A b'a yi Tshùaben z'a be Nsi be là; tse tsho'te ntsha lo' njoṅ nsitsha' fa.

⁸A be nkwimte kàn se, mb'a ke zi ndagte, nke nkwimte ntshob mi a na' mfa', num zwiaṅ ntsha' mbùm nà,

⁹nke nkwimte kàn s'a wat bo Abraham nà, nkwimte nu z'a tshob nsaṅlaṅ bwe Isak là.

¹⁰A lo' ngù ntshù' yi num Yakob, ndo' ngù kàn s'a tswe matmat là yi num Israél,

¹¹mb'a na' ntshob ndù: Me nsi fà ngô Kanaan wù là; a b'a yu bag ntsi'i.

¹²Bo na' mb'a metsit bwoṅ yube, ke yàm, mbe ghùn mum ngô.

¹³Bo nke ndo mum mo' ngô nèn mum mo'o; ntum ntùm mo' nufen ntsho ntùm ngô ghua.

¹⁴Là, Tshùaben ke bam ndù sàm mèn ghùtni yube. A tshùa num tu bo, naṅ ntsha num fenfen,

¹⁵ntshob ndù: Kà bin yab bu num ben tshàm tse me tsho'te yub là, ke bèn ngù sàm nukebwô ghantum tshàm.

¹⁶A lo' kekua nse' yi mum ngô. A be'te nkoṅ nke' bàn fa.

¹⁷A tum ta' mènntùn mbwe bo. Bo swèn Yosèf mba nkuan nà.

¹⁸Bo so nku mi ntùm nkebu', nso tô i ntùm nkù tùne,

¹⁹tà nkum lé'njù se ju z'a na' ntshob bumte, lé'njù se ntshob Tshùaben la'te mb'a be là yi là.

²⁰Mfen tum bo nèn nkiagte Yosèf. Ngatô ngôngô ghù bo kag i.

²¹A lo' i ngù tshùaben yi mum ndà i fa, ndo' i ngù ngatô njoṅ tshu tse fa yi,

²²ndù a tagte bon mfen mb'a kô là, mba ndù a tswite kamkam tse zenu.

²³Ndùlala Israél nèn mà Egipto. Yakob tswe mà ngô Kam.

²⁴Nsi ghù ze nzwit bwe yàme, a ghù bo ta ntshùa ghakeban tshobe.

²⁵Nsi bate ntù ghakeban ndù bo ke mban ze nzwit mèn, nke ngù mfùm num bo.

²⁶A tum ngafa' i Mosé, mba Aron z'a na' ntsho' i là.

²⁷Bo ghù tshu netshàm netèt bo mb'a tshob bo là, mba ba nsà mum ngô Kam.

²⁸A tum njame, dù' sènte, là bo ke zete num ntshob mi.

²⁹Nsi ghù nta'ntse mub kaṅ ntù' lem, ngù ngontse kwùte fa.

³⁰Metu' dun ntùm ngô yube, tà nkum ntùm nto'ndà fenfen tshobe.

³¹A tshob, nzenze ts'a ghù njoṅ nà tum, ntshèt be njoṅ dù' fa mum ngô yube.

³²A fà nywin mbaṅ bo num ze dù' mbaṅ; ba lambwôg be ntùm ngô yube.

³³A be'te nkùa yube, mfagte mbatsi mube, mbe'te ntù mi a be mum ngô yub là.

³⁴A tshob ngamntàn tum, ngamntàn ke njoṅ i tum,

³⁵bo fèt njoṅ nenà fa ntùm ngô yube, njù njoṅ ntàm tù fa num tsha'a.

³⁶A zwite njoṅ mbwe bon fa mum ngô yube. Mbwe ntàm ngù' yub.

³⁷Nsi ghù ba Israél tum, ndù bo ket nkàb mba gol, sàm mèn netèt bo, netèt njoṅ nzwit yub fa ke ghô njam.

³⁸Ba Egipto tsiaṅte mba bo nèn nà. Nummbe bwôg lo tshùb njoṅ yub fa.

³⁹Tshùaben kag ndot, nelo' nkabte bon Israél yi. Mba ngwat mbwôge, neke nké' yub yi tèttswe'.

⁴⁰A ghù ntemsaṅ se', ndaṅndaṅ mba bo bètte là, ngù bo jù bàn z'a fe kamànyam nà njwèle.

⁴¹A gha' gholoṅ ntse tum bwe, nswe' num kônkwa mba ta'ntse là.

⁴²Nummb'a lo ke nkwimte ntshob mi mi nelàn mi a tshob Abraham ngafa' i là.

⁴³A lo' ze nzwit mèn ntum yi à ntùm ṅwate, ngù ben tse ts'a tsho' là tum à mum tshu'te tsiaṅte.

⁴⁴A fà tsha' ngôngô bo, mbèn mfà bin mfa' benntùn bo.

⁴⁵Ndùlala ndù bo tshùb ntag mi, mbèn nke nze ntshù' mi! Aléluya! Ghamte be Tshùaben.