Read Medumba Yobkwi 106 Bible Online

Yobkwi 106 - Medumba bible

Yobkwi 106

¹Aléluya! Bin ghamte Tshùaben, nummb'a b'a mèn mebwô, nummbe kondèn i be ntswe matmat!

²We z'a nsi tshob mfa' Tshùaben mi ndùb à? We z'a nsi soṅ ghamt'é à?

³Ghafen b'a ghaze ntshù', ben tse bo be ngù nunetsin njoṅ ngelaṅ fa là!

⁴Tshùaben, kwimte yag njam nkôni z'o ghù num yu nzwit mèn nà. Kwimte yage, mfà ywimt'o bag.

⁵Ndùlala ndù bag yen fu' ben tsho ts'o tsho' yub là, ndù bag tsiaṅte mum tsiaṅte z'a tum ngô o là, nte nka'te num ntsi' mu!

⁶Bag lo ghù nukebwô mba tà tshag là, bag lo fàn nu, bag lo ghù nu z'a ke' bwô là.

⁷Tà tshag lo ke ju' sàm ju num mfa' mu mi nekuni mà Egipto. Bo lo ke kwimte nkôni o ze ndùb. Bo lo ta tu Nsi z'a mfe tù là, mbaṅ dibantse, dibantse meba.

⁸A lo yôg yub num nu lén se, ndù a lo' nda'te ngù' i yi.

⁹A tshobte dibantse meba, a jum. A ghù bo zin ntùm ntse, mba bo b'a num kônkwa là.

¹⁰A lo yôg yub bu mèn z'a ke mbàn yub là.

¹¹Ba ntse kabte ghamaṅte yube, bo kwù mba ta' i ntshù' ke bèn ntù'ù.

¹²Bo bam ntshob mi, bo yob kwi ngamt'é yi.

¹³Là bo lagte mfa' mi ndende, ke béb ndù njoṅ njabnu mi fa bumte.

¹⁴Ghe'te tsho num bo num kônkwa. Bo laṅte Nsi ngelaṅ bo be tù' bo là.

¹⁵A fà ju ze bo bètte là bo, mbèn ntum ntsha' netèt bo, a ghù bo nke njume.

¹⁶Bo la'te ntùm kaṅ dù' ze bo be là ndù bo ghù ntù ghe'te num Mosé. mba Aron, mèn nelàn Tshùaben.

¹⁷Tsha' gha', mi Datân, nkabte ze bwoṅ ben Abirâm.

¹⁸Mbwôg kù yub bwoṅ benntùn, lambwôg kù tse ghatshùagntù.

¹⁹Bo nabte mén mfô Horéb. Bo vù nsi mbwe neto tùne.

²⁰Bo bate ghamte yub num nyàmna' z'a be mfèt nenà là.

²¹Bo lagte Nsi, ngayôg yube. Nsi z'a na' ngù tshu ndùbndùb mà Egipto là.

²²A ghù ba nsà mum ngô Kam, ngù tshu netshàm num dibantse meba.

²³A tshob ndù a' biagte yube. Là Mosé mèn z'a tsho' i là tsin mbwe mba ngatshùb fenkaṅ nà, mbotte yantù i, ntshètt'é nebiagte yube.

²⁴Bo wag ngô yôg mebwô, ke bam ntshob Tshùaben.

²⁵Bo zwete tun ntô ntùm ntàb tshobe, ke ju' nze Tshùaben.

²⁶A bù' bu i nsi num bo, ntshob nsaṅlaṅ bwe mb'a ghù bo vùte num kônkwa,

²⁷nsate nzwit yub netèt ba tum, nsote yub mum ngôngô.

²⁸Bo tamte boa Baal-Péor, njù tshu bo lo' ngamte fe ben yi là.

²⁹Bo tshùa njam ngùninu mub ngù a ya ntù, mo' ngokèt vù netèt bo.

³⁰Ndùlala Finéas lo tù mbu' mbu Tshùaben, yen ngokèt là tsin.

³¹Bo siaṅte yen nà yi mba nunetsin nà, ngu'ngu', njoṅ ndù fa.

³²Yen nà be tôge, bo ghù ntù i ya mbaṅ ntse Mériba. A tshùa njam nukebwô yub Mosé be ngayennge'.

³³Nummbe bo lo so ngùtni ntù Mosé, a zwete ntshob ke njam i num nkub ntshu mi.

³⁴Bo lo ke biagte ngôngô tse Tshùaben na' ntshob bo là.

³⁵Bo so wut num ba tum, nzi'te njoṅ tshob mat neghù fa.

³⁶Bo fa' neto tshobe, neto tù' ywi' bo.

³⁷Bo lo' nshumnshum tshob mba ngonngon tshob ngamte ba neto yi.

³⁸Bo fètte lem mbu'u, lem nshumnshum tshob mba ngonngon tshob tse bo lo' ngamte ba neto yi mà Kanaan, mbagte ngô lem nà.

³⁹Bo tshùa num ngùninu mub nkale.

⁴⁰Ndùlala yantù Tshùaben lo' mbwôg num ze nzwit mèn, a wag ntsi' mi.

⁴¹Tshùaben fà yub mum mbu ba tum, ghakeban tshob tse bo ke mban yub là tô yube.

⁴²Ghakeban tshob ghùtni yube, bo ma' yub bam mbu mube.

⁴³A tshu' yub ngelaṅ yàme, là tu wut tshob be ghatatu num ntag mi, nke ntaṅ nga mbwe mum nukebwô yub!

⁴⁴Ndùlala a yen nge' yub, nju' nkua' mube,

⁴⁵a tshùa num bo, nkwimte kàn se, ndaṅndaṅ mb'a be mum kondèn i z'a gha' mbu là, a ko ndèn,

⁴⁶ngù bo fon kondèn mbaṅ njoṅ benntùn fa tse bo lo' yub ngù kuan yi là.

⁴⁷Tshùaben Nsi yag, yôg yage, nsô yag netèt ntumntum, ndù bag fà ghamte lén so se nelàne, ndù bag ta'nsoṅ ntùm nenyàmt'o.

⁴⁸Ghamte be Tshùaben, Nsi Israél, fe ndùke lo tà nèn nkum mba ndùke lo. Njoṅ ze nzwit mèn fa nsi tshob ndù: Amén! Aléluya! Ghamte be Nsi.