Read Medumba Yobkwi 108 Bible Online

Yobkwi 108 - Medumba bible

Yobkwi 108

¹Yobkwi David.

²O Nsi, ntù àm yà nabte wul i, me tshwèt nkô neyob kwi, nkô nebu' tshu njoṅ ngô ntù àm fa.

³Loṅ mba loṅ nsa, bin bam num miaglo. Me nsi bam mfôgnjù num miaglo.

⁴Tshùaben, me nsi nyàmt'o netèt benntùn, me nsi bu' tshu wù netèt ngôngô.

⁵Nummbe kondèn o b'a ze ndùb mba kamànyam nà, nenùn o be tà mfe num ndot.

⁶O Nsi, tswe tà mfe kamànyam! A bwô ndù nkuni mu tswe num njoṅ nsitsha' fa.

⁷Ndùlala ndù o tshu' ben ts'o be nkô yub là. Yôg bag bu o ze zwim, mbùnte bag!

⁸Nsi tsin ntùm ndà i ze nelàn ntshob ndù: Me nsi tshùa ntsho; me nsi ghabte Sikém, me nsi fi' tômbo' Sukkot.

⁹Me bèn ngù Galad; me bèn ngù Manasé. Efraim b'a tshètntsho tu àm, Yuda be kôg fen yàm netô.

¹⁰Moab b'a tôntse se me be nsôg wul àm bwe là! Me te ko'fen sàm mum ngô Edom. Nke njob ngu' ntsho mum ngô Filistia.

¹¹We z'a nsi lo' àm nèn yi mum ngô ze bo kut ndiaṅ mbum à? We z'a nsi lo' àm nèn yi mà Edom à?

¹²O Nsi, a ke mb'a ndù o ghua' yag ké? O ke' bèn netum bin à tshag ntshu ntsho.

¹³Fà ywimte bag num ngamaṅte yage, nummbe ze ywimte mènntùn b'a banban.

¹⁴Be nsi tshùa njam Nsi kà fa' mfa' ndùbndùb, a yi nsi bèn nyiaṅte tse be ghamaṅte nku.