Read Medumba Yobkwi 115 Bible Online

Yobkwi 115 - Medumba bible

Yobkwi 115

¹Tshùaben, fà ghamt'â num lén so, ke b'a num bag, k'a b'a num bag, là num kondèn o mba num nenùn o.

²Be ba ghakelèn Nsi tshob ndù: Nsi yub b'a yà ndùke?

³Nsi yag b'a mfe kamànyam, a be ngù ju z'a kô là.

⁴Neto tshob ts'a be tshob nsi là b'a tùn nkàb mba gol, fa' mbu mènntùn;

⁵bo ghù ntshu ke be tshob, ngù miag ke be yen,

⁶ngù ntoṅ ke be ju', ngù ntselag ke be ju' njwèt ju,

⁷bo ghù mbu ke be kwag ju, ngù nku ke be zin, sàm nze ke' be tum nzetô bo.

⁸A bwô ndù ben tse bo be njab ntù num bo là be mba bo là!

⁹Tunndà Israél, yab ntù o num Tshùaben, yi ngaywimte yub mba tshètntsho yub.

¹⁰Tunndà Aron, yab ntù o num Tshùaben, yi ngaywimte yub mba tshètntsho yub.

¹¹Bin tse bin be mbwôg Tshùaben nà yab ntù num i, a b'a ngaywimte yub mba tshètntsho yub.

¹²Tshùaben be nkwimte be, a nsi yab kàn be, a nsi yab kàn tunndà Israél, a nsi yab kàn tunndà Aron,

¹³a nsi yab kàn ben tse bo be mbwôg Tshùaben nà, ben nke'nke' mba tse ndùbndùb.

¹⁴A bwô ndù Tshùaben kwi'te zine ngù bin yàme, bin mba bon tsine.

¹⁵A bwô ndù Tshùaben yab kàn bin, yi z'a nabte kamànyam mba tsha' là.

¹⁶Kamànyam b'a kamànyam Tshùaben, là, a lo fà nsitsha' bon mènntùn.

¹⁷A ke b'a fe ben nke nyàmte Tshùaben, ke be ben tse bo tswe ntshu mi' là.

¹⁸Là, a bag tse bag be ntùn nà nke ngamte Tshùaben fe ndonni kà kum mba ndùke lo! Aléluya! Ghamte be Nsi.