Read Medumba Yobkwi 132 Bible Online

Yobkwi 132 - Medumba bible

Yobkwi 132

¹Yobkwi ko'ko'. Tshùaben, kwimte David, mba njoṅ ze ju' ntshu fa.

²Ngelaṅ z'a kàn mfe mbwe Tshùaben, ngelaṅ z'a ghù nka'ni Ndum Yakob là:

³Me ke nsi tsho ntùm ntàb z'a be ndà àm nà, me ke nsi ko' num kunndà sàm, dù' me ke nzi là,

⁴me ke nsi bam miaglo tsho tu àm, ke bam ndù nkub miag màm kabte,

⁵tà nkum ngelaṅ ze me fon ze dù'ntswe Tshùaben nà, dù'ntswe Ndum Yakob.

⁶Tshù, bag lo ju' ndù a b'a mà Efrata. Bag lo fon i mum ntù Jaar.

⁷Bag bin nèn mum ze dù'ntswe, ngwù nsi mbwe nko' nku mi!

⁸Tshùaben, lo nsi nse' mum yu dù' fite, wù mba Koṅ Kàn yu neta.

⁹A bwô njoṅ ghale'te Nsi fa tse bo b'a tsho là ma' nunetsin num bo, ben tsho tse nenùn ke ntsiaṅte.

¹⁰Tshùa num David ngafa' o, mbe ke tèn yu ngayo' mfèt.

¹¹Tshùaben lo tshob nsaṅlaṅ bwe David; a b'a nenùne, a ke nsi gha yen nu là. Me nsi lo' mén à num mèn z'a tum zwe' o là kà yab num ko'fen s'a be so là.

¹²A be ze bon tsho tse bandum tshùb kàn sàm, mba ntshù' mi me nsi zi'te yub yi là, mba bon tshob tse bandum mba yub tu wut nsi tswe num ko'fen so matmat.

¹³Tshùaben tsho' Sion, a kô, ndo' i ngù dù'ntswe i yi:

¹⁴A b'a yàm dù' fite njoṅ ndù fa, me nsi ke tswe à bwe, nummbe me kô i.

¹⁵Me nsi naṅ mbotni num jujù i, lo' bàn nkém bwoṅbwoṅ tse yi;

¹⁶me nsi ma' yôg num ghale'te Nsi tse, ben tse tse nenùn nsi tshag nze yub tù num tsiaṅte;

¹⁷me nsi bù'te neta David bwe, me nsi nabte lambo yab yàm ngayo' mfèt;

¹⁸me nsi ma' tuswe num ghakeban tse, màkwa me te tu i là ke nzwiage.