Read Medumba Yobkwi 135 Bible Online

Yobkwi 135 - Medumba bible

Yobkwi 135

¹Aléluya! Bin ghamte lén Tshùaben, ghafa' Tshùaben, bin ghamt'é,

²Bin tse bin tsinte ntùm ndà Tshùaben ntùm bam ntshundà ts'a be tse Ndà Nsi be là.

³Bin ghamte Tshùaben, nummbe Tshùaben b'a mèn mebwô, bin ke njob lén se, nummb'a b'a mèn nefite!

⁴Nummbe Tshùaben lo tsho' Yakob, ntsho' Israél ndù a tù' ze ju.

⁵Nummbe me lèn ndù Tshùaben b'a mèn ndùb, Tshùaben be b'a mèn ndùb ntshùa njoṅ nsi fa.

⁶Tshùaben be ngù njoṅ tshu fa ts'a kô là, mfe kamànyam mba num nsitsha'a, ntùm ba dibantse mba ntùm njoṅ ngem fa.

⁷A be ngù ba ndot lo tôg tsha' nko'o, a be ngù mbeba' mbaṅ mba mbaṅ, a be ngù mfetmbaṅ tum ntùm dù' ts'a be bwe là.

⁸A b'a yi na' ndab mbwe bon ba Egipto, neto' num mènntùn nèn nkum num nyàm.

⁹A tum ba nsà boa tshu netshàm netèl o, me Egipto, num Faraon mba num njoṅ ghafa' tse fa.

¹⁰A b'a yi na' ndab ngôngô yàme, nzwite fenfen neta:

¹¹Sion mfen Amor, Og, mfen Basan, mba njoṅ nufen fa ts'a be Kanaan nà.

¹²A fà ngô yub mba ju ntsi' là, mfà i Israél ze nzwit mèn mba ju ntsi' là.

¹³Tshùaben, lén so tswe matmat, Tshùaben, yu nekwimt'o tswe ngu'ngu'.

¹⁴Nummbe Tshùaben nsi tsho'te ntsha ze nzwit mèn, ko ndèn ghafa' tse.

¹⁵Ba nsi neto ba tum bo lo' à nkàb mba gol nabte yi. Tshen neto là b'a fa' mbu benntùn.

¹⁶Bo ghù ntshu ke be tshob, ngù miag ke be yen,

¹⁷bo ghù ntoṅ ke be ju', mba nda' metsit ywèt ke' be tum ntshu bo!

¹⁸A bwô ben tse bo be nkom yub là be ndaṅndaṅ mba bo là, ben tse bo be njab ntù num bo là be ndaṅndaṅ mba bo là.

¹⁹Tunndà Israél, bin ghamte Tshùaben, tunndà Aron, bin ghamte Tshùaben,

²⁰tunndà Lévi, bin ghamte Tshùaben, bin tse bin be mbwôg Tshùaben nà, bin ghamt'é.

²¹Ghamte be Tshùaben z'a mà Sion nà, yi z'a be ntswe Yérusalém nà. Aléluya!