Read Medumba Yobkwi 139 Bible Online

Yobkwi 139 - Medumba bible

Yobkwi 139

¹Ntshagte yobkwi. Yobkwi David. Tshùaben, o be nzwi't'àm.

²O lèn ngelaṅ me tswe nsi là, mba ngelaṅ me tsin tù là. O be ndèn nkwatenu màm tà ngùanesà,

³ke me zin ke me nô nsi lo, mb'o lène, o lèn njoṅ tshàm manze fa.

⁴Nummbe ntshob be mbe be num lém sàm ndù wù Tshùaben à bwôgmbwe ndèn njoṅ i fa,

⁵O lam àm mbume, njam mba mbwe, mbèn njab bu num àm.

⁶Zenu z'a b'a mesim me, ntshùa àm nà, a nèn tà tù neshu, me ke' ku'ni nenyi' mba nku nkum bwe.

⁷Me nsi kù ywèt tsho nèn à yà? Me nsi kù se o nèn à yà?

⁸Me fe nko' nèn mfe kamànyam mb'o be bwe là, me nô be ntùm ngô fe ben mba tshù wù là bwe.

⁹Me lo' be mbàb mfôgnjù, nèn ntswe tà ngùanesà mbaṅ dibantse,

¹⁰mba mba nsen nà bu o be ntshagt'àm, bu o ze zwim ghom àm.

¹¹Ndùlala me tshob ndù: Mb'a lo mbwô ndù njam kabt'àm, nelàn z'a mbaṅ àm nà tù' njame.

¹²Là mba njam ke' be sènte tse num yu tu, tèttswe' bèn nke ndànte wù à mba mbwôgtshù là. Njam be wù à mba nelàn nà.

¹³A b'a wù na' mbèn nabte zwe' àm, mbèn mbom àm bam màa.

¹⁴Me be ngamt'o num tshu netshàm tse nekuni ts'o ghù là. Mfa' mu b'a netshàme, ntù àm lèn ndùlala kua' mebwô.

¹⁵Mvôg màm lo ke lem num miag mu, ngelaṅ ze bo na' mbom àm ntùm tsham, ngelaṅ bo bom àm bam tsha' là.

¹⁶Miag mu lo ke njen àm ngelaṅ bo ke nke' mfi' àm nà; bo lo kite njoṅ i fa mum ṅwa'ni o, nkite lé'njù ts'o na' njab me kà lèn ju netèt bo mbe là.

¹⁷Nsi, nkwatenu mu ta àm neshu, njoṅ i yàm neshu.

¹⁸A be ze me siaṅte yub là, mba nkwatenu Nsi a' yàm ntshùa nkwango'; me be mbam num miaglo, bag wù bèn mbe.

¹⁹O Nsi, a bwô ndù o zwi tshùagntù mèn! Ghù ghafètte lem nèn ngùanesà mbaṅ àm.

²⁰Bo be ntshob nu num o kebwô, nke mbù' tu yub nsi num o banban.

²¹Tshùaben, a ke' bwô ndù me bàn ben tse bo num mban o là ké? A ke' bwô ndù me ya ntù ben tse bo be nkamt'o là ké?

²²Nkembàn ze me ghù num bo là b'a ze ndùb, bo b'a ghakeban mbwe àm.

²³O Nsi, zwi't'àm, ndèn ntù àm, laṅt'àm, ndèn yàm nywin,

²⁴Lôt'a be ze me b'a num manze kebwô là, ntshagt'àm num manze z'a be matmat là.