Read Medumba Yobkwi 140 Bible Online

Yobkwi 140 - Medumba bible

Yobkwi 140

¹Ntshagte yobkwi. Yobkwi David.

²Tshùaben, tshu' àm mbu ghatshùagntù, tshètt'àm num ngafètte lem,

³ben tse bo be nkwate nukebwô ntùm ntù tshob là, bo be nkam ntsho njoṅ lé'njù fa.

⁴Bo be ma'te lém sob mba nyu là, bo ghù njoṅ nyu tun kub ntshu sobe.

⁵Tshùaben, béb àm mum mbu tshùagkèt mèn, tshètt'àm num ngafètte lem, ben tse bo be nkwate neghù me tiag là,

⁶ben tse bo be mbùn nkù tun nku màm nà, ghako'te wut tse bo bùn ywi' mba nkù num ntshùa màm, njab ywi' num manz'àm nà.

⁷Me tshob Tshùaben ndù: A b'a wù bèn mbe yàm Nsi, Tshùaben, ju' nze tshàm le'te!

⁸Tshùaben z'a be Tshùaben, mba neta ngayôg àm nà, o be nkabte tu àm mum lé'njù ntsho.

⁹Tshùaben, kà bam ndù nkwatenu ghatshùagntù bumte, kà bam ndù njabnu mi vù lag, mbwôg ndù k'a ka'te num bwe.

¹⁰A bwô ndù mfànnu mi a num nkub ntshu ben bo lam àm mbum nà vù be num tu bo,

¹¹a bwô ndù bo ma' nge'mbwôg nedum num bo, a ma' yub ntùm mbwôge, ntùm ngem dù' ze be bo ke bèn ntum nà.

¹²Kà ghatshob tatte ghubte num nsitsha'a, a bwô ndù nukebwô bwe ghafètte lem à vù vù.

¹³Me lèn ndù Tshùaben nsi ghù nu ndaṅndaṅ ghayennge', ghù nunetsin bwoṅbwoṅ.

¹⁴Ṅ, ben netsin nsi ghamte lén so, ben ndaṅndaṅ nsi tswe mbwe o.