Read Medumba Yobkwi 145 Bible Online

Yobkwi 145 - Medumba bible

Yobkwi 145

¹Yobkwi David. Nsi àm, mbe mfen àm, me nsi nyàmt'o. Me nsi ghamt'o njoṅ ndù, ghamt'o matmat.

²Me nsi ke ghamte lén so njoṅ lé'njù fa, me nsi nyàmte lén so njoṅ ndù fa, nyàmt'é matmat.

³Tshùaben b'a mèn ndùb, a ku'ni mb'a be bo nyàmt'é là, ze ghu' ke' ghù mfi' i.

⁴Bo be nyàmte mfu' mu num mba zit zwiaṅ benntùn no, nke nsoṅ mfa' mu mi nekuni.

⁵Me nsi tshob nkuni mu ze ghamte mba nku'ni be bwe là.

⁶Bo nsi tshob neta o z'a be kag fétwut là, tu wul àm me nsi soṅ yu neghu'u.

⁷Bo nsi kwimte bwôntù o ze ndùb, bo nsi tshob yu nunetsine.

⁸Tshùaben b'a ngakondèn mba ngabwôntù, a be ndèt wut num yantù, mbe ndù a dun nkôni.

⁹Tshùaben b'a mèn mebwô num njoṅ benntùn fa, kondèn i be mbe num njoṅ mfa' mi fa.

¹⁰Tshùaben, a bwô ndù mfa' mu ghamt'o, njoṅ ben tsho tse nenùn fa ghamt'o;

¹¹a bwô ndù bo tshob nkuni nufen so, nsoṅ mfa' mu mi nekuni,

¹²num neghù bon mèn nyiaṅtu lèn mfa' mu mi nekuni, nkuni mba ghamte nufen so.

¹³Nufen so b'a s'a tswe ngu'ngu' là. Yu neta netô bèn ntswe matmat. Tshùaben num ndo' bwôntù i, ngù njoṅ nka'ni mi fa bumte.

¹⁴Tshùaben be ntomte ben tse bo vù nsi là, ntsiagte ben tse bo ṅam nà.

¹⁵Miag njoṅ benntùn fa be nte à num o, nke nzwi't'o, ndù o fà jujù bo num ngelaṅ ntùn.

¹⁶O be nga' bu o, benntùn fa jù njwèle, mba bo kô là.

¹⁷Tshùaben b'a mèn netsine num njoṅ tse manze fa, mbe ngakondèn num njoṅ mfa' mi fa.

¹⁸Tshùaben ghebte mbaṅ njoṅ ben fa tse bo be ntsiaṅ i là, njoṅ ben fa tse bo be ntsiaṅ i à ntùm nenùn nà.

¹⁹A be ngù ju ze ghabwôg i kô là, a be nju' mba bo tsiaṅ i là, njôg yube.

²⁰Tshùaben be mbéb njoṅ ben fa tse bo be nkô i là, mbiagte njoṅ ghatshùagntù fa.

²¹Ntshu àm nsi tshob ghamte Tshùaben, njoṅ benntùn fa ghamte lén se se nelàn ngu'ngu'.