Read Medumba Yobkwi 18 Bible Online

Yobkwi 18 - Medumba bible

Yobkwi 18

¹Ntshagte yobkwi. Se ngafa' Tshùaben. Se David z'a tshob men ntshob yobkwi li Tshùaben, ngelaṅ a tshu' i mbu njoṅ ghakeban tse fa mba mbu Saulo là.

²A tshob ndù: O Tshùaben, me num nkô o, o b'a yàm neta.

³Tshùaben b'a ngabloṅ àm, sàm fùn, ngatshu' àm! Nsi àm, ngabloṅ àm, me nsi yen dù' nefite bwe à num o! O b'a yàm tshètntsho, mbe neta z'a be njôg àm nà, mbe yàm ndàlem.

⁴Me num ntshob ndù: Be ghamte Tshùaben, a tshu' àm mbu ghakeban tshàm.

⁵Ndam vù lo lam àm, fet vù lo kag fétwut num àm.

⁶Ndam vù lo lam, njwi' vù lo ghom àm.

⁷Ntùm nge' àm, me lo tsiaṅ Tshùaben, me lo kua' Nsi àm. A lo tsin ntùm ndà i nju' nz'àm, me lo kua' tà nz'àm nèn tà ntam ntùm ntoṅ mi.

⁸Tsha' lo vètte, nyi'te, tun mbat kumte. Bo lo vètte, nummb'a lo ya ntù.

⁹Nzembwôg lo ke ntum mum mfaṅ ntselag mi, mo' mà mbwôg nke ntum ntshu i, nge'mbwôg meba nke ntum bwe.

¹⁰A kôgte kamànyam, nswe' nse'e. A lo ghù mo' mà ndot tun nku mi.

¹¹A lo ko' num mo' kérubim, nke mfùle; a lo ke mfùtte num mbàb fetmbaṅ.

¹²A lo ke ndo' njam ngù ze dù' lem yi, ntàb i be ba ntse nesèn mba ndot nesèn.

¹³Ndot lo ke ntum ntùm nkuni mi a tam mbwe i là, nke ma' nywinmbaṅ boa nge'mbwôge.

¹⁴Tshùaben fà nz'é tù mfe kamànyam, Nsi z'a mfe tù là ghù bo ju' nz'é.

¹⁵A ma' nkét mi, nsate ghakeban tshàm yi. A ghù beba' mbaṅ nke ntumte yàme, ndù a ghù bo kù nène.

¹⁶Ba koṅntse tum, bo yen tun njù, Tshùaben, mba num nu yu tshùag, Tshùaben mba num nu fet yantù o. Num yu tshùag, wù Tshùaben, num mfùag z'a tum ntùm mfaṅ ntselag mu là.

¹⁷A nyit bu i mfe kamànyam, ngom àm, a sô àm ntùm ntse ndùbndùb.

¹⁸A tshu' àm mbu neta ngakeban àm, mbu ghakeban tshàm tse bo na' ngù neta ntshùa àm nà.

¹⁹Bo lo ṅwag num àm ntùm lé'njù nge' sàm, là Tshùaben lo be yàm dù' neyé'te bwe.

²⁰A lo kwé àm, ntshu' àm, nummb'a num nkô àm.

²¹Tshùaben lo ghù me ndaṅndaṅ mba yàm nunetsin be là. A lo ghù me ndùlala nummbe me b'a mbu'u.

²²Nummbe me zin num tse manze Tshùaben, ke be ngavù ntsha mbwe Nsi àm.

²³Njoṅ nkàn mi fa lo be mbwe àm, me ke' to' lo tshàm mbaṅ ntshù' mi.

²⁴Me lo be kelo' mbwe i, nke nzete num nu mfànnu màm.

²⁵Ndùlala Tshùaben lo ghù me ndaṅndaṅ mba yàm nunetsin be là, ngù me ndùlala mb'a yen ndù me b'a mbu' mbwe i là.

²⁶O be nda'te ndù o ghù bwôntù mèn z'a ghù bwôntù là. O be ngù nunetsin mèn z'a be mèn netsin nà.

²⁷O be nda'te ndù o làn mèn z'a be nelàn nà. O be ngù nukebwô ndaṅndaṅ mba ng'é be mèn kebwô là.

²⁸O be njôg ben tse bo num mbétni là, nke nkôg ben tse bo be nko'te wut là.

²⁹Ṅ, o be ngù nka' àm ké', Tshùaben Nsi àm, ké'te njam ze me be ntùm bwe là.

³⁰Me be ntsho' ngwù num bwoṅ ben bo ghù tshuntshùag là ngelaṅ bag wù bèn mbe là. Me be ndut mà kàbngô ndùb, ngelaṅ bag Nsi àm bèn mbe là.

³¹Tse manze Nsi bwô neshu, ntshob Tshùaben b'a mi nenùne. Tshùaben b'a tshètntsho njoṅ benntùn fa tse bo be njab ntù num i là.

³²We z'a be Nsi kà ke b'a Tshùaben à? We z'a be ngabloṅ kà ke b'a Nsi be à?

³³A b'a Nsi na' nso neta num àm, ntshagt'àm ntùm manze ndaṅndaṅ.

³⁴A lo ghù nku màm be mba mi shutnyàm nà, nte àm num dù' neṅate.

³⁵A lo zi'te mbu màm nema' ntsho, mbu màm lo dù' ngoṅkét tùne.

³⁶O lo fà yu tshètntsho yôg me, bu o lo gha'te manze tun nku màm, nku màm ke be tiag tse.

³⁷Kondèn o num ngù me kù nde neta ke fàn ku àm.

³⁸Me lo ta' ghakeban tshàm nkote yube, me lo ke bèn njam ke be ndù m'a biagte yube.

³⁹Me lo be'te yube, bo ke bèn nku' nelo tù. Bo lo vù tun nku màm.

⁴⁰O lo so neta num àm nema' ntsho; o lo ghù ghakeban tshàm vù nsi mbwe àm.

⁴¹O lo ghù ghakeban tshàm tam àm mvèn yub, me lo biagte ben tse bo be mban àm nà.

⁴²Bo lo kua'a, sàm mèn z'a yôg yub là ke be. Bo lo kua' ntsiaṅ Tshùaben, a ke bùnte bo,

⁴³me lo nyute yube, bo be mba mbab mi mfetmbaṅ be nket là, nyiaṅte yub nku mba netob mi a num manze là.

⁴⁴O lo kwé àm mbu ghakag tshu'te njab àm num tu ngôngô. Ben tse me na' mbe ke lèn yub là bo lo fà yub me.

⁴⁵Neju' ntshu lo b'a mbwe nu bo, bon ba tum tshwèt mfùagt'àm.

⁴⁶Bon ba tum vù. Bo tshwèt mbe tum ntùm kàbngô tshob nke mvètte.

⁴⁷Tshùaben te ku i num nenàfi, ghamte be ngabloṅ sàm. A bwô ndù me nyàmte Nsi ngayôg àm.

⁴⁸Nsi lo bam yagte mba' me, ma' ba tum nsi mbwe àm.

⁴⁹A lo tshu' àm mbu tshùagkèt ghakeban tshàm! O lo bù' àm tù mbwe ghakeban tshàm, njôg àm mbu ghafètte lem.

⁵⁰A ndùlala me nsi nyàmt'o, wù Tshùaben, netèt ba tum! Me nsi ke yob kwi ghamte lén so yi.

⁵¹A lo tshu' mfen i yoṅ yàme, nko ndèn ze ngayo' mfèt. Ngù ndùlala num David, mba num nzwil i matmat.