Read Medumba Yobkwi 33 Bible Online

Yobkwi 33 - Medumba bible

Yobkwi 33

¹Ben netsin, bin tsiaṅte num lén Tshùaben! Ghamte be mbe mebwô ben tse bo ghù ntù netsin nà.

²Ghamte Tshùaben num loṅe, bin ghamt'é num loṅ s'a ghù nsa gham nà.

³Bin yob kwi nswe yi! Bin bù'te nze tshu nebu' tù, mfà nze tsin tù.

⁴Nummbe ntshob Tshùaben b'a ndaṅndaṅ, njoṅ mfa' mi fa be mbumte ntùm nenùne.

⁵A be nkô nunetsin mba nu ndaṅndaṅ. Kondèn Tshùaben dun num nsitsha'a.

⁶Ntshob Tshùaben na' mbèn nabte kamànyam. Ywèt ntshu tse nabte njoṅ tshu fa ts'a be mfe kamànyam nà.

⁷A be nkùmte ntse mi a ntùm dibantse là dù' ntshù'; naṅ ntse ntùm ndamntse.

⁸A bwô ndù njoṅ njù fa bwôg Tshùaben. A bwô ndù njoṅ benntùn fa tse bo ntùm njù là ke mvètte mbwe i.

⁹Nummb'a be ntsiaṅe, ju ṅwag, ntshobe, ju be.

¹⁰Tshùaben be nsate nkwatenu ngôngô, mbiagte njabnu benntùn.

¹¹Nkwatenu Tshùaben be ntswe matmat. Njabnu ntù i nke ntswe ngu'ngu'.

¹²Mènfen b'a ngô ze Tshùaben be ze Nsi là, ghafen be ben tse Tshùaben tsho' yub ndo' ngù ze ju ntsi' yi là!

¹³Tshùaben be ntswe mfe kamànyam ma' miag mi, njen njoṅ bon mèn nyiaṅtu fa.

¹⁴Tshùaben be ntswe ntùm ndà i ndôte, ndôte njoṅ benntùn fa tse bo be ntswe num tsha' là.

¹⁵Yi z'a nabte ntù mba we lo là, be nte lag num njoṅ mfa' mub fa.

¹⁶A ke' b'a mà ntshu ntsho ndùb bèn nke njôg mfen. A ke' b'a mà neta ndùb bèn nke ntshu' ngatshùa ntsho.

¹⁷A ke' b'a neta nyàmdiaṅ nke mfà netshùa ntsho. Njoṅ ze ngù' fa ke' ku'ni netshu' mèn.

¹⁸Tshù, lag Tshùaben te num ben tse bo be nju' ntshu i là, num ben tse bo be nywinte num kondèn i là.

¹⁹Ndùlala ndù a kwé yôg sob vù, ngù bo ke njôg ntùm kekua.

²⁰Ntù yag be nywinte num Tshùaben. A b'a yag ywimte mba yag tshètntsho.

²¹Nummbe ntù yag yab ze tsiaṅte num i, nummbe bag yab ntù yag num lén se se nelàne.

²²Tshùaben! A bwô ndù kondèn o be num bag, mba bag num nywinte num o là.