Read Medumba Yobkwi 35 Bible Online

Yobkwi 35 - Medumba bible

Yobkwi 35

¹Yobkwi David. Tshùaben ma' ghakamt'àm ntsho.

²Lo' tshètntsho ze ndùb mba ze nke'e, ndo nsi njwimt'àm.

³Sab kô njà' mba mà bàb ntshu kô num ghatsho' nku màm kebàn. Soṅ ntù àm ndù o b'a ngayôg i.

⁴A bwô ndù tuswe ko ben tse bo be nkô nezwi àm nà. A bwô ben tse bo be ndiag nebiagt'àm nà be bènte njam nja ntù.

⁵A bwô ndù bo be mba kôngàn se fetmbaṅ bèn nke nkel i nèn yi là. A bwô ndù Angél Tshùaben ta' yube!

⁶A bwô ndù manze yub tam njame, nke ntiage. A bwô ndù Angél Tshùaben tam njam bo.

⁷Nummbe bo bùn àm nkù yub ke ntun num tô. Bo tswe' tô, là ke ntun nelo' nzwi àm yi.

⁸A bwô ndù nesate ghom yub ke bo lèn, bo vù ntùm nkù ze bo bùn nà, a bwô ndù bo vù tô.

⁹Ndùlala me nsi ghù tsiaṅte num Tshùaben, ntùm zwiag sàm, ṅwate num ze ywimte.

¹⁰Njoṅ nkam wut màm fa nsi tshob ndù: Tshùaben! We z'a ku'ni netshu' ngayennge' mba mbwoṅ, mbu mèn z'a tshwèt mfétt'é mba wù à?

¹¹Ghakwénta tse tatte lo nsi, nke mbètt'àm nu num ju ze me ke' lèn nà.

¹²Bo be ndo' nukebwô njagte numebwô yi. Bo ghua' ntù àm.

¹³Ngelaṅ bo na' nke ngon nà, tu wul àm nke nse' bwembwôge, nke mfà wut nsi ntùm netswe nziku'u, nke mben tu àm nsi num kunndà sàm, nde'te Nsi.

¹⁴Me lo ke nsoṅ wul à nsi mb'a b'a num mo' nshun nà, mb'a b'a num mo' mfèt là, nke ntse'te wut ntùm nge' mb'a b'a num vù mo' mà là.

¹⁵Là ngelaṅ tu wul àm vù nsi là, bo tsiaṅte, mbèn ntse'te, ntse'te ke soṅ àm, num netut'àm. Bo be nsé't'àm ke faṅ ngelaṅ

¹⁶boa ben kebwô mba ghatshabte be mfèt nsô num àm.

¹⁷Tshùaben, o nsi yen yen nu l'à ndùke? Tshu' ntù àm num ma'ni yub, kwé yôg sàm mbu bon ngwayit,

¹⁸me nsi nyàmt'o ntùm mbumte ndùb. Me nsi ghamt'o netèt nzwit mèn z'a yàm nà.

¹⁹Kà ben tse bo be mbàn àm banban nà tsiaṅte tshob num àm. Kà ben tse bo be mbàn àm ke ntun nà lo' mvèn miag mub ntshabt'àm yi!

²⁰Nummbe ntshob mi a be ntum ntshu bo là ke' b'a ntshob fite. Bo be nkua' nu tatte num bétni benntùn ntùm ngô.

²¹Bo be nga' ntshu yub nte nge num àm, ntshob ndù: Ah! Ah! Miag mag tshwèt njene.

²²Tshùaben, o be njene, kà tswe ntshu mi'i. Tshùaben, kà nèn ngùanesà mbaṅ àm.

²³Lo nsi, lo nsi ngù nunetsin me! Nsi àm mba Tshùaben àm, tshèt njam àm.

²⁴Tshùaben Nsi àm, lo' yu nunetsin ntsho't'àm yi! Ndù kà bo bèn nke ntsiaṅte num àm!

²⁵A ke' bwô bo tshob ntù bo ndù: Ah! Ah! Tshù ju ze be kô là. A ke' bwô bo tshob ndù: Bag biagt'é.

²⁶A bwô ndù tuswe ko njoṅ benntùn fa. Ben tse bo tshwèt ntsiaṅte num nge' àm nà! A bwô ndù tshabte mba tuswe tsho num ben tse bo be ndo nsi num àm nà.

²⁷Ṅwate mba tsiaṅte be ben tse bo num njen ndù me b'a mbu'u, nke ntshob ke tsin ndù: Ghamte be Tshùaben z'a be nkô ndù ngafa' i tswe fite là.

²⁸Lém sàm nsi ghamte nunetsin o, a nsi ke nyàmt'o njoṅ lé'njù fa.