Read Medumba Yobkwi 37 Bible Online

Yobkwi 37 - Medumba bible

Yobkwi 37

¹Yobkwi David. Kà ya ntù num ghatshùagntù, kà ghe'te ben tse bo be ngù nukebwô là.

²Nummbe bo be njob ndende mba nenà là, nte' mba nenàfi là.

³Yab ntù o num Tshùaben, ngù numebwô. Lo' ngô ngù dù'ntswe yi, jù ju, njôg ntùm fite.

⁴Yab yu tsiaṅte num Tshùaben, a nsi fà ju ze ntù o tshwèt nkô là wù.

⁵Yab yu njoṅ nu fa bu Tshùaben. Yab ntù o num i: A nsi ghù mb'a ku'ni là.

⁶A nsi ghù nunetsin o tum ntsin mba nka' là, ghù yu nu ndaṅndaṅ be mba lagnyam be njagnyam nà.

⁷Tswe ntshu mi' mbwe Tshùaben, nywinte num i. Kà ya ntù mèn ze njoṅ manze tse fa zin mebwô là, num mèn ze njoṅ nkwatenu mi mi kebwô fa be ngwù lag là.

⁸Faṅ yantù là, ghua' tshùagntù, kà ya ntù, mbwôg ndù k'o ghù nukebwô.

⁹Nummbe bo nsi sô ghatshùagntù. Ben tse bo be nywinte num Tshùaben nà nsi ghù ngô.

¹⁰A tù' mén nda'nda' tshùagkèt mèn be ke bèn mbe. O be ndôte dù' z'a be bwe là, a ke bèn nebe bwe.

¹¹Ba keju mbu nsi bèn ghù ngô, bo nsi tsiaṅte yàm yàme ntùm fite.

¹²Mèn kebwô magte nkwate kebwô num mèn netsine. Nke mfèt nsô num i.

¹³Tshùaben be nzwi tse num mèn kebwô. Nummb'a yen ndù se lé'njù ghebte.

¹⁴Ghatshùagntù be tsho' ṅwi, ndù' ngoṅkét yub, neghù ndù ngayennge' mba mbwoṅ vù, mba nezwi ben tse manze yub tsin nà.

¹⁵Bi sob nsi sob ntù yube, ngoṅkét mub nsi be'te.

¹⁶Mebwô b'a metsit ju ze mèn netsin ghù là, ntshùa fu' se ghatshùagntù yàm be ntùm bwe là.

¹⁷Nummbe bo nsi be' mbu ghatshùagntù. Là Tshùaben be ntomte ben netsine.

¹⁸Tshùaben be ndèn tse lé'njù benntùn tse bo tsin nà, ntsi' mub be ntswe matmat.

¹⁹Tuswe ke ko yub num ngelaṅ nge'. Bo be njù njwèt ngelaṅ kekua.

²⁰Là ghatshùagntù nsi bi, bo tse bo b'a ghakeban Tshùaben nà, bo nsi tôg à mba nenà ts'a ntùm nà là, bo nsi tôg nèn bite mba nzembwôg là.

²¹Tshùagkèt mèn be mfo ke bèn mba' njam, mèn netsin be nko ndèn, nke mfà.

²²Nummbe ben tse Tshùaben yab kàn bo là bèn ngù ngô. Ben tse Tshùaben so ndon num bo là, bo nsi sô yub ntùm ngô.

²³Tshùaben be ngù nku mèn ta nsi; nku mèn ta, nzin mi nke mbwô Tshùaben.

²⁴A be ngwù nsi ke ghô bwe, nummbe Tshùaben num ntshùb bu i.

²⁵Me lo be ménnshum, ndonni me ywène, ke to' yen mèn netsin ze Tshùaben ghua' i là. ke bèn njen ze nzwit nke ndon jujù.

²⁶A be nko ndèn njoṅ ndù fa, nke mfo ze nzwit nke mbe ntùm mbotni!

²⁷Kù nukebwô, ngù numebwô, ndù o ghù dù'ntswe yoṅ ntshù'.

²⁸Nummbe Tshùaben be nkô nunetsine, ke be ghua' shun tse. Bo biagte ben tse bo ke' tsin nà matmat, bo biagte nzwit ghatshùagntù.

²⁹Ben netsin nsi ghù ngô, tswe bwe njoṅ ndù fa.

³⁰Ntshu mèn netsin be nsoṅ zenu, lém se nke ntshob nunetsine.

³¹Ntshù' Nsi i be mbe ntù i. Nku mi ke' be tiag.

³²Tshùagkèt mèn be nton mèn netsine, nke ndiag nezwi i.

³³Tshùaben ke' be faṅ ntùm mbu mube, ke faṅ bo naṅ ntsha num i ngelaṅ bo tsho'te ntsha i là.

³⁴Nywinte num Tshùaben, mbèn ngô num manz'é. A nsi bù' o tù ndù o ghù ngô. O nsi yen ghatshùagntù tse bo sô yub là.

³⁵Me lo yen tshùagkèt mèn ntùm njoṅ ze neta fa, a nke nèn mbwe mba tù s'a te' là.

³⁶A lo tôge, tshù a ke' bèn nebe. Me be ndiag i, ke bèn neyen i.

³⁷Lôte mèn mebwô, te lag num mèn netsine. Nummbe nzwit ngafite num bwe.

³⁸Là bo nsi biagte nzwit ghatshùagntù, sô nzwit ben kebwô.

³⁹Yôg ben netsin ke mfe à Tshùaben, a b'a ngakabte yub ngelaṅ nge'.

⁴⁰Tshùaben be njwimte yub mbèn ntshu' yube. A be ntshu' yub mbu ghatshùagntù, njôg yube. Nummbe bo be ndiag yub ndàlem a num i.