Read Medumba Yobkwi 40 Bible Online

Yobkwi 40 - Medumba bible

Yobkwi 40

¹Ntshagte yobkwi. Se David. Yobkwi.

²Me lo yab yàm nenywinte num Tshùaben; a ben wul i num àm, nju' nkua' màm.

³A lo sô àm ntùm gheme, ntùm gheme nebagte, mà ntùm netob. A te nku màm num ngabloṅ, ngù nku màm ta nsi.

⁴A lo yab mo' yobkwi nswe ntshu àm, ghamte be Nsi yag. Ben yàm nsi yen i, bwôg tshùb njoṅ yub fa. Njoṅ yub fa nsi yab ntù num Tshùaben.

⁵Mènfen b'a mèn z'a be njab ntù i num Tshùaben nà. Z'a ke' be tam bwoṅ boa ghako'tewut mba ghatatte là.

⁶Tshùaben, Nsi àm, o lo kwi'te mfa' mu mi nekuni mba ntenu mu num yag ywimte. Mèn z'a be mba wù là ke bwe, me tshwèt nkô nesoṅe, mbèn ntshob yen ju là. Là, a yàm neshu kà me ke ku'ni nesoṅe.

⁷O ke' kô jule'te Nsi mba ju bwôntù Nsi. O lo gha' ntoṅ màm. O ke' be bètte ju neton ngamt'o yi, ke bèn mbètte ju z'a kwù num nu kondèn nà.

⁸Ndùlala me tshob ndù: Tshù, me se'e. Ntùm ṅwa'ni nebote bo kite nu num àm bwe ndù:

⁹Nsi àm, me kô neghù yu nekô! Ntshù' mu b'a mà ntùm ntù àm.

¹⁰Me be nsoṅ nunetsin Tshùaben ntùm mbumte ndùb; tshù, me ke' be kabte nkub ntshu màm, wù Tshùaben, o lène!

¹¹Me ke' be mem nunetsin o ntùm ntù àm. Me be nsoṅ yu nenùn mba so yôg. Me ke' be lem kondèn o mba yu nenùn ntùm mbumte ndùb.

¹²Wù Tshùaben! O ke nsi gha kondèn o me. Kondèn o mba yu nenùn nsi ke béb àm njoṅ ndù fa.

¹³Nummbe ngùtni ke ndù i lam àm mbume. Mfànnu màm kabte tu àm, me ke ku'ni nefènte neke njen ndùlala. Bo yàm ntshùa nyiaṅtu tshàm. Mba yàm fènte ghua' àm.

¹⁴O Tshùaben, a bwô ndù o tshu' àm! Tshùaben se' ndende njwimt'àm.

¹⁵A bwô ndù tuswe ko ben tse bo be nkô nezwi àm nà. A bwô ndù ben tse bo be ndiag nebiagt'àm nà be bèn njam nja ntù!

¹⁶A bwô ndù bwôg tshùa njam tuswe ntsho num ben tse bo be ntshob me ndù: Ah! Ah! là.

¹⁷A bwô ndù njoṅ benntùn fa tse bo be ndiag o là be ntùm ṅwate, mbèn nke ntsiaṅte num o! A bwô ndù ben tse bo be nkô so yôg là ke ntshob ke tsin ndù: Ghamte be Tshùaben!

¹⁸Tu wul àm, me b'a mbwoṅ mbe ngayennge'. Là Tshùaben be nkwimt'àm. O b'a ngaywimt'àm mba ngatshu' àm: Nsi àm, kà ke'te ku.