Read Medumba Yobkwi 45 Bible Online

Yobkwi 45 - Medumba bible

Yobkwi 45

¹Ntshagte yobkwi. Num ndoṅe. Se bon Koré. Yobkwi. Se nkôni.

²Ntù àm dun ntshob ntùn! Me nsi ghù mfen àm ju' yobkwi sàm! Lém sàm b'a kùt ṅwa'ni nkum ngakite.

³O bwô ntshùa njoṅ bon mèn nyiaṅtu fa me mfen àm. Kondèn dun num nkub ntshu mu. A ndùlala ze Nsi yag kàn wù yoṅ ntshù' là.

⁴Neta ngama' ntsho, tam ṅwi nkembe' o, num ghamt'o mba nkuni mu.

⁵Nabte nkét mu, ko' num nyàmdiaṅe, num nunenùne, num bwoṅ nunetsine. A bwô ndù bu o ze zwim la'te mfa' mu mi netshàme.

⁶Bo kùa nkét mu. Benntùn nsi vùte mbwe o. Ghakeban mfen ke' bèn ngù fènntù.

⁷O Nsi, ko'fen so tswe matmat. Kôg fen so b'a kôg fen nunetsine.

⁸O be nkô nunetsine, nke mban tshùag. A ndùlala, o Nsi, Nsi o lo yo' mfèt tsiaṅte netèt shun tsho.

⁹A lo yo' o mire, aloès mba kasia, ts'a tshwèt ndamte num nzwe tsho là. Ntùm ba ntshwèt nsô nsennyàm, ndoṅ nse' ghù ntù o nke ntsiaṅte ngelaṅ bo bu' là.

¹⁰Ngonngon fenfen num netèt bènnzwi tse bo kô yub là. Màmfen b'a num bag bu o ze zwim ndù a kwi wul i gol z'a fe Ofir là.

¹¹Ngon àm, ju'u, yene, kù' ntoṅ; lagte ngô o mba ndà tàan.

¹²Mfen te lag num bwô o. Mb'a b'a Tshùaben o là.

¹³A bwô ndù ngon Tiro vù nsi mbwe i boa nda' nzenze. Ghafu' ntùm njù nsi ghamt'o.

¹⁴Ngon mfen be nke nzin ntùm ndà à mum nkuni, ndù nzwe i ghù gol num bwe.

¹⁵Bo be mbe te i mbwe mfen ndù a ket nzwe tse bo vèn nà, bonngon, shun tse tse bo lo' yub nse' yi mbaṅ o là tam njam i.

¹⁶Bo lo' yub ntsho yi netèt tsiaṅte boa ṅwate, bo tsho ntùm ntshwèt mfen.

¹⁷Bon tsho nsi lo' ze dù' tà tsho. O nsi yabte yub mba bon mfen nà ntùm ngô fa.

¹⁸Me nsi ke kwimte lén so ntùm njoṅ zwiaṅ njù fa. Mba benntùn nsi ke nyàmt'o ngu'ngu'.