Read Medumba Yobkwi 5 Bible Online

Yobkwi 5 - Medumba bible

Yobkwi 5

¹Ntshagte yobkwi. Ntùm medub. Yobkwi David.

²Tshùaben! Kù' ntoṅ nju' ntshob màm, ju' mba me tshwèt ndàn wù là!

³Kù' ntoṅ nju' mba me tshwèt ntsiaṅ o là, wù mfen àm mbèn mbe Nsi àm. A wù ze me tshwèt nde't'o là.

⁴Tshùaben! O be nju' nz'àm nkebnjù, me be mbe nkebnjù, nkaṅ wul àm nke nzwi't'o.

⁵O ke' b'a Nsi z'a be mbam nukebwô là, tshùagkèt mèn ke' ku'ni nebe yu ngùn,

⁶nga, kagni ke' ghù netsin mbwe o; o num mban ghatshùagntù,

⁷o be mbiagte ghatatte. Tshùaben be mbàn ghafètte lem mba ghamfùm.

⁸Là, mba me là, me be ntshùa njam kondèn o ze ndùb, ntsho ntùm nd'o. Me num ngwù nsi mbaṅ nd'o ze nelàne, ndù me dun bwôg.

⁹Tshùaben, tshagt'àm njam yu nunetsine num nu ghakeban tshàm, tsiagte manz'o mbwe àm.

¹⁰Nummbe nu ntùn ke ntshu bo, nebagte bèn nke mbwô yube. Nzetô yub b'a fi s'a te nge là, lém sob tswe à mb'a ndùm ṅwa' là.

¹¹Nsi, lo' yub mba ghavù ntsha là, ghù bo vù nsi ntùm njabnu mube, ta' yub mbwe o num nukebwô tshob ts'a yàm neshu là. Yoṅ yub mbwe o num tatu yube.

¹²Tsiaṅte be njoṅ benntùn fa tse bo be ndem num o là, ṅwate be ben ts'o be ntshètte yub là, ben tse bo be nkô lén so là be ntsiaṅte num o.

¹³Nummbe wù Tshùaben! O be naṅ mbotni num mèn netsine. O be ndo' kondèn o ntshètt'é yi mba tshètntsho là.