Read Medumba Yobkwi 50 Bible Online

Yobkwi 50 - Medumba bible

Yobkwi 50

¹Yobkwi. Se Asaf. Nsi neta, Nsi, Tshùaben tshob nu: A tsiaṅ njù, benntùn neto' fe bag ntumnyam nèn nkum bag mbinyam.

²Nsi tsin mà Sion, dù' z'a bwô miagte là, nke nziage.

³A tshwèt nse'e, Nsi yag tshwèt nse'e, a ke nsi tswe ntshu mi'i. Mo' mbwôg z'a tshwèt nkù là num mbwe i, mo' fetmbaṅ neta diaṅ i mbume.

⁴Nsi tsiaṅ kamànyam mba nsitsha'a. A nsi tsho'te ntsha ze nzwit mèn:

⁵Bin tse'te ben tshàm tse nenùne, tse bag à bo wat kàn njam jule'te Nsi là.

⁶Kamànyam nsi tshob nunetsin i, nummbe Nsi bèn mbe ngatsho'te ntsha.

⁷Ben tshàm, bin ju' ju ze me nsi tshob là, Israél, bin ju'u, me nsi bem zine, me b'a Nsi, mbe Nsi o.

⁸Me ke ntshobt'o à num nu tshule'te Nsi tsho. Tshule'te Nsi ts'o be nton ke mb'a be mbwe àm njoṅ ndù fa.

⁹Me ke nsi lo' fot mfô ntùm ndà o, ke lo' mfot mbwe ntùm nkin mbwe mu.

¹⁰Nummbe njoṅ nyàm fa ts'a ntùm mfèn nà b'a tshàm. Njoṅ nyàm nzenze fa tse bo be num mbat là b'a tshàm;

¹¹me lèn njoṅ nsaṅ fa mi a mfe kamànyam nà, njoṅ bon tshu nezinte fa ts'a tshwèt là b'a tshàm.

¹²Nziku' lo nja àm mba me ke tshob wù, nummbe njù mba tshu ts'a ntùm bwe là b'a tshàm.

¹³Me be mfèt mbàb mfot mfô ké? Me be nu lem mfot mbwe ké?

¹⁴Ju ze b'o ghù Nsi là b'a nenyàmt'é, mbèn ngù ndù yu nka'ni z'o ghù Nsi z'a tà mfe tù là bumte.

¹⁵Tsiaṅ àm mum lé'njù nge'; me nsi yôg o, o ke ngamt'àm.

¹⁶Nsi tshob tshùagkèt mèn ndù: Numk'o nke ntshob ntshù' màm à? Numke kàn sàm nke mbe ntshu o à?

¹⁷Wù z'o be nga nu z'a zin nka, nke ma' ntshob màm njam tu o là.

¹⁸O be njen ntshô, ntsiaṅte bin yi. Yu bag i b'a ze ghaghù màndà.

¹⁹O be mfà ntshu o num nukebwô. Lém so b'a mfe' tatte.

²⁰O be ntswe nsi nke ngù ndam num mfèl o, nke mbagte lén mén màan.

²¹Tshù ju z'o ghù là. Be me tswe ntshu mi' ké? O lo ke nkwate mbe me fut'a wù. Là me nsi tshobt'o, yab njoṅ nu fa num miag mu.

²²Bin tse bin be ndagte Nsi là, bin zete, mbwôg ndù a be ze me sé'te zin nà, sàm mèn ke ku'ni nekwé zine.

²³Mèn z'a be nyàmt'àm nà be ngamt'àm. A be z'a lôte zin se là, mba me nsi ghù a yen yôg s'a fe Nsi là.