Read Medumba Yobkwi 55 Bible Online

Yobkwi 55 - Medumba bible

Yobkwi 55

¹Ntshagte yobkwi. Num ndoṅ nse'e. Yobkwi David.

²O Nsi! Kù' ntoṅ nju' le'te. Kà lem ngelaṅ me tshwèt ma' mbu wù là.

³Ju' me, bùnte me! Me be ntsha bag bag ntùm yàm nenywine, nke nzi'i.

⁴Num nze ngakeban mba ngùtni tshùagkèt mèn, nummbe bo be ngù nge' vù num àm, nke mbwe àm ntùm yantù yube.

⁵Ntù àm tshwèt mvètte ntùm bwe. Bwôg vù ghom àm.

⁶Bwôg mba fétwut ghom àm, nesaṅ lam àm mbume.

⁷Me tshob ndù: Oh! A lo mbe ndù me ghù mbàb bwoṅtambia', mb'a be me fùt, mb'a be me fon dù' nefite.

⁸Tshù, mba me nsi kù nèn ngùanesà, mba me nsi tswe kônkwa,

⁹mba me nsi fon dù'ntswe ndende, num neta fetmbaṅ mba tonkèt fetmbaṅ z'a tshwèt nsate dù' là.

¹⁰Tshùaben, biagte yube, fagte ntshob mube! Nummbe me yen nu nefètte lem mba ntsha ntùm ngô.

¹¹Bo be ndam ngô tèttswe' mba mbwôgtshù num kàbngô. Mfànnu mba nukebwô num ntùm bwe.

¹²Nukebwô num netèl i, fùte bo tatte ke' be lo num nsém.

¹³A ke' b'a ngakeban bèn nke ntshabt'àm, mb'a be me fènt'é. A ke' b'a ngamaṅt'àm bèn ndo nsi num àm, mb'a be me lem tshàm num miag mi.

¹⁴A b'a wù ze me ke ndo' o mba nguan àm nà, wù z'o lèn sàm tsham, mbe nshun àm nà.

¹⁵Be lo ke ntamte njôg à ntùm fite. Bag à bin bwoṅ benntùn lo ke nèn ntùm Ndà Nsi!

¹⁶A bwô ndù vù kab mbu num bo. A bwô ndù bo swe' nèn miag nge' ntùm ngô fe ben, nummbe nukebwô num ntùm dù'ntswe yube, netèt bo.

¹⁷Tu wul àm, me be nkua' Nsi, Tshùaben nsi yôg àm.

¹⁸Me be nzwiage, nke nzi' mfetnjù, nkebnjù mba njagnyam. A nsi ju' nz'àm.

¹⁹A nsi tshu' àm mba bo à ben bo ghebte mbaṅ àm nà, ghù me tswe fite, nummbe ben tse bo tshwèt mban àm nà yàm neshu.

²⁰Nsi a' ju', ngù bo vùte nsi, yi z'a tswe num ko'fen se fe ngu'ngu' là. Nummbe nebate ke num o. Bo ke' be bwôg Nsi.

²¹A be mbù' bu i num ben tse bo à bo na' ntswe fite là, mbagte kàn se.

²²Ntshu i dùmte ntshùa ṅwa'a, là ntsho be ntùm ntù i; ntshob mi be mbotte ntshùa mfèt, là njôg mba mbi netshùag mi mo' ju ke' bomt'é là.

²³Yab yu nu bu Tshùaben, a nsi tomt'o. A ke nsi faṅ ndù mèn netsin tiag sàm lé'njù.

²⁴Mbe se' mba wù Nsi là, o nsi ghù bo swe' nèn mà tun gheme. Ghafètte lem boa ghafùte ke nsi kum mba netèt lé'njù tshobe. Me ke njab yàm ntù à nda' num o.