Read Medumba Yobkwi 68 Bible Online

Yobkwi 68 - Medumba bible

Yobkwi 68

¹Ntshagte yobkwi. Se David. Yobkwi.

²Nsi lo nsi, ghakeban tse sate, ghamaṅt'é kù mbwe i.

³O be mbiagte yub ndaṅndaṅ mba nzembwôg mi a bite là. Bo be njag ntùm mbwôg ndaṅndaṅ mba nyiaṅṅwa' là. Ghatshùagntù be mbi mbwe Nsi.

⁴Là, ben netsin be ntsiaṅte, nke ntshùa ntsho mbwe Nsi, ṅwate nke ndo' yub nèn yi.

⁵Bin yob kwi mfà Nsi, bin ghamte lén se. Bin fag manze mèn z'a tshwèt ntshùa num ndot là! Lén se b'a Tshùaben. Bin tsiaṅte mbwe i.

⁶Tà bontse, ngakabte fôg bènnzwi, b'a Nsi z'a tswe ntùm dù'ntswe i ze nelàn nà.

⁷Nsi be mfà tunndà ben tse bo ghua' yub là. A be ntshu' ba bu' ngù bo tswe ntùm fu', nda' ghatatu bèn nke ntswe ntùm dù' njum.

⁸O Nsi, ngelaṅ z'o na' ntum mbe mbwe ben tsho là, ngelaṅ z'o na' nke nzin kônkwa là,

⁹tsha' lo nyi'te, kamànyam yag mbwe Nsi, Sinaï vètte mbwe Nsi, mbwe Nsi Israél.

¹⁰O Nsi, o lo ghù mbaṅ mebwô lo, o bèn nso neta num ju ntsi' z'a bot là.

¹¹Ben tsho lo lo' dù'ntswe yub ntùm ngô z'o na' ntshùa njam bwôntù o nabte ghayennge' là.

¹²Tshùaben tshob ta' ntshobe, ghantum nkùn mebwô tù' mà ntshu ntsho ndùb.

¹³Tàndà ntsho kù, nkù nène, ntshu ntsho z'a tù' ndà là ghabte ntsha' ntsho:

¹⁴Mbàb bwoṅtambia' be ndù nkàb ghebte bwe, mfe mi be ndù a b'a mba gol là.

¹⁵Ngelaṅ Nsi Nganeta sate fenfen mum ngô là, nywinmbaṅ nke ngwù mà Tsalmon.

¹⁶Mbat Basan b'a mbat Nsi. Mbat Basan b'a mbat ze tu tse yàm nà.

¹⁷Tu mbat ts'a sag neshu là, numke bin nke nge'te, nke nge'te mbat ze Nsi kô nelo' ngù dù'ntswe i yi l'à? Tshùaben nsi tswe bwe matmat.

¹⁸Bo ke nsiaṅte nkalig Tshùaben à ntsha'ntsha' bo ke nsiaṅte nkalig Tshùaben à ntsha' gham yoṅ ntsha' mbùm. Tshùaben fe Sinaï nse' ntùm dù' nelàne.

¹⁹O lo be ko' nèn mfe tù ndo' ghandàtsha, bo lo fà benntùn wù mba nda' là. Mba ghatatu nsi tswe mbaṅ Tshùaben Nsi.

²⁰Ghamte be Tshùaben njoṅ lé'njù fa. A be ze bo fétte yag là mba Nsi a' yôg yage.

²¹Nsi be bag à mba Nsi ngatshu' yage. Tshùaben, Tshùaben yag bèn nke nkwé yag bu vù.

²²Ṅ, Nsi a' tsit tu ghakeban tse, to num tu ben tse bo be njôg ntùm nukebwô là.

²³Tshùaben tshob ndù: Me nsi lo' yub lo yi Basan, me nsi lo' yub tum yi mà ntùm dibantse.

²⁴Ndùlala ndù o so ku o ntùm lem, lém mbù tsho ghù yub bag i num ghakeban.

²⁵O Nsi, bo be njen zin so! Zin Nsi àm, zin mfen àm, ntùm dù' nelàne.

²⁶Ghayobkwi be ntam mbwe, ghabu' tshu be njam bo. Ngonngon be netèt nke mbu' lammbé.

²⁷Bin ghamte Nsi mum mbumte zin. Bin ghamte Tshùaben me nzwit Israél.

²⁸Benjamin lo be bwe, kebatnjab z'a be ntô yub là. Fenfen Yuda boa nzwe tse bo vèn nà, fenfen Zabulon, fenfen Néftali.

²⁹Nsi, lo' neta o ntshob nu yi, O Nsi, me tshob à neta z'o fa' fa' yi num bag là,

³⁰neto' fe ndà o z'a tsin Yérusalém nà. Fenfen nsi lo' nda' se' fà wù.

³¹Kag fétwut num nyàm nka'nesoṅ, kag fétwut num mfot mfô boa mfô ba tum tse bo be ngwù nsi boa ndô nkàb là, sate ba tum tse bo be ntsiaṅte nema' ntsho là.

³²Ben ndùbndùb be mfe Egipto, Etiopia, nkù nde nse' ntshag mbu mub Nsi.

³³Nufen nsitsha', bin yob kwi mfà Nsi. Bin ghamte Tshùaben.

³⁴Bin yob kwi mfà mèn z'a tshwèt ntshùa mfe kamànyam, kamànyam z'a tswe matmat là. Tshù, a ghù bo ju' nz'é, nz'é ze neta.

³⁵Bin fà ghamte Nsi! Nkuni mi b'a num Israél, neta i be mfe kamànyam.

³⁶O Nsi, o be ntswe dù' o ze nelàn nke nkuni. Nsi Israél be mfà neta mba ngù' ze nzwit mèn. Ghamte be Nsi.