Read Medumba Yobkwi 69 Bible Online

Yobkwi 69 - Medumba bible

Yobkwi 69

¹Ntshagte yobkwi. Yobkwi David.

²O Nsi! Yôg àm. Nummbe ntse tshwèt ndiag nebiagte yôg sàm.

³Me tshwèt ntsho ntùm netob, ke ku'ni netsin tù. Me vù ntùm lamntse, ntse dun num àm.

⁴Me kua' tà mbole, nzetô àm jum. Miag màm yub nze num nebéb Nsi àm.

⁵Bo yàm ntshùa nyiaṅtu tshàm, ben tse bo be mban àm ke ntun nà yàm. Ben tse bo be ndiag ndù me bi là ta neshu. Ben tse bo be ghakeban tshàm à banban nà. Bo be ngù me tô ju ze me ke' bèn ndo' là.

⁶O Nsi, o lèn yàm bà, nukebwô tshàm ke bèn ndem mbwe o.

⁷A ke' bwô ndù tuswe tshùa num tu àm nko ben tse bo be nywinte njam o là me Tshùaben, me Tshùaben tàndà ntsho. A ke' bwô ndù tuswe tshùa num àm nko ben tse bo be ndiag o là, me Nsi Israél!

⁸Nummbe bo ke ntshabt'àm à num tu o, tuswe ke nkut se àm à num tu o.

⁹Me tù' ngùn mba netèt fèt tshàm, ntù' mèn ze bo ke' lèn i là netèt bon màa num tu o.

¹⁰Nummbe nkôni num ndà o nsi mi àm. Tshabte ghatshabt'o vù num àm.

¹¹Me be mfètte ntsenyà, ntswe nziku'u, yen nu là lo' tshabte nse' yi.

¹²Me be ndo' bàm ngù nzwe yi, ntù' ju komzwi.

¹³Ben tse bo tswe nzendà là tshwèt ntshob nu num àm. Ghanu neta ndu' nke njob lén sàm.

¹⁴O Tshùaben, me ke nde'te yàm à wù mum ngelaṅ mebwô. Tshùa njam kondèn o ze ndùb mbùnte me, tshùa njam ywimt'o ze nenùn mbùnte me.

¹⁵Sô àm ntùm netob, ndù kà me bèn nswe' nèn nsi. A bwô ndù o tshu' àm mbu ghakeban tshàm, mbèn nsô àm lamntse.

¹⁶Kà ntse bèn ndun num àm, kà ghem bèn mi àm, kà tô kabte num àm.

¹⁷Tshùaben, bam le't'àm, nummbe kondèn o zi neshu. Tshùa njam kondèn o ze ndùb ntam lag so num àm.

¹⁸Kà lem ngafa' o se o. Mba me b'a ntùm nge' là, nànte mbam le't'àm.

¹⁹Kù'te nse' mbaṅ ntù àm njôg i. Yôg àm num nu ghakeban tshàm.

²⁰O lèn yàm tshabte, yàm tuswe, yàm ghomte. Njoṅ ghakeban tshàm fa b'a mbwe o.

²¹Tshabte be' ntù àm, me nke ngone. Me be mbéb kondèn, là mbéb à banban, nke mbéb ghafà ntage, ke yen mba ta' i ntshù'.

²²Bo be ma' zwetshù'tshù' ntùm yàm jujù. Ngelaṅ ntù àm kù là, bo fà tshùagkèt ndu' me.

²³A bwô ndù téblé sob tù' ywi', mbe nkù num yub ntswe mebwô.

²⁴A bwô ndù miag mub tam njame, ke bèn neyene. Ghù ndù zwe' yub ke ntiag njoṅ ndù fa.

²⁵So yantù num bo, tshùagntù ze ndùb yab mbu num bo.

²⁶A bwô ndù yub dù'ntswe sate. Kà benntùn bèn ntswe ntùm tshob ntàb.

²⁷Nummbe bo be ntsho' nku mèn z'o lab i là kebàn, nke nkwi'te nge' num mèn z'o be't'é là.

²⁸Kwi'te mfànnu num mfànnu mube, ndùlala ndù kà bo ghù yub bag i ntùm kondèn o.

²⁹A bwô ndù bo bwete lén sob ntùm ṅwa'ni yôg, ke bèn nkite lén sob boa ben netsine.

³⁰Tu wul àm, me b'a ntùm ngùtni mba ntùm nge', o Nsi, a bwô ndù yu ywimte bèn mbù't'àm.

³¹Me nsi ghamte lén Nsi àm num yobkwi, me nsi nyàmt'é mum njobkwi.

³²Yen nà bwô Tshùaben ntshùa fot mfô z'a ghù ndô mi boa nku mi là.

³³Ghayennge' be njen i ntsiaṅte; bin tse bin be ndiag Nsi là, a bwô ndù ntù zin yôge.

³⁴Nummbe Tshùaben be nju' nze bwoṅbwoṅ, ke be wag bu' tse.

³⁵A bwô kamànyam mba tsha' ghamt'é, ba dibantse mba tshu ts'a be nzinte ntùm bwe là ghamt'é.

³⁶Nummbe Nsi a' yôg Sion, bèn kut ngô ts'a Yuda là; bo nsi tete bwe, lo' ghù yub yi.

³⁷Nzwit ghafa' tse nsi ghù yub ju ntsi' yi. Ben tse bo be nkô lén se là nsi ghù dù'ntswe yub bwe.