Read Medumba Yobkwi 72 Bible Online

Yobkwi 72 - Medumba bible

Yobkwi 72

¹Se Salomon. O Nsi, fà yu tsho'te ntsha mfen. Fà yu nunetsin mén mfen!

²Ndù a lo' nunetsin ntsho'te ben tsho yi, ntsho'te tsho ghayennge' ndaṅndaṅ.

³A bwô ndù ba mbat lo' fite nse' yi ben tsho, nkônga lo' nunetsin nse' yi.

⁴A nsi ghù nunetsin ghayennge' tse bo ntùm ngô là. A nsi yôg bon mbwoṅ nyiaṅte ngaghùtni nku.

⁵A nsi tswe tà kum mba zit ngelaṅ no ze lagnyam ke' ntum nà, tswe tà kum mba zit ngelaṅ no ze maṅwù ke' ntum nà, ntswe ndùlala num njoṅ ngu'ngu' fa.

⁶A nsi be mba mbaṅ z'a tshwèt ndo num tsha' bo yôg netshebte là, mba mbaṅ ndùb z'a be nzwi' tsha' là.

⁷Num sen lé'njù là nunetsin nsi te'e. Fite nsi yàm tà kum ngelaṅ ze maṅwù ke bèn nebe là. Tô ta'ntse nèn kum num ntôg tsha'a.

⁸A ke ntô njù neto' num mo' dibantse nèn nkum num mo', to' num Efrat nèn nkum num dù' ze nsitsha' miagte bwe là.

⁹Ghatswe kônkwa nsi kwim tukekwi' nsi mbwe i; ghakeban tse nsi lat mbabe.

¹⁰Fenfen Tarsis bo ba ngô tètntse nsi fà ntshub, fenfen Séba mba tse Saba nsi fà ba nda'.

¹¹Njoṅ fenfen fa nsi vù nsi mbwe i. Njoṅ ngôngô fa nsi fa' yi.

¹²Nummb'a nsi tshu' mbwoṅ z'a tshwèt nkua' là, tshu' ngayennge' mba mèn z'a ke' ghù ngaywimt'é là.

¹³A nsi ko ndèn mèn z'a bot là mba mbwoṅ, a nsi yôg bwoṅbwoṅ.

¹⁴A nsi tshu' yub num ngùtni mba num nefètte lem. Lem tshob nsi ghù njoṅ i num miag mi.

¹⁵Ngelaṅ z'a ke' ntùn nà, mba bo nsi fà gol z'a fe Séba là yi. Bo nsi le'te num ze tu ke tsin, bo nsi ke ghamt'é njoṅ lé'njù fa.

¹⁶Ngefet nsi yàm ntùm ngô, num tu ba mbale, nko' ngefet nsi nyi'te mba ntù mi a Liban nà; benntùn nsi te' ntùm ba ngô mba nenà num tsha' là.

¹⁷A bwô ndù lén se be njoṅ ndù fa. A bwô ndù lén se be njoṅ ndù fa ze lagnyam ke' ntum nà; benntùn nsi tshùa njam i yab kàn bo bo. Njoṅ ngôngô fa nsi tshob ndù a b'a mènfen.

¹⁸Ghamte be Tshùaben Nsi, Nsi Israél z'a be ngù nu nekuni nda' tù' i là!

¹⁹Ghamte be lén se se nekuni njoṅ ndù fa. A bwô ndù ghamt'é be num njoṅ nsitsha' fa. Amén! Amén! A bwô ndù a be ndùlala.

²⁰Njoṅ tse le'te David, mén Isaï mi nsen ni.