Read Medumba Yobkwi 80 Bible Online

Yobkwi 80 - Medumba bible

Yobkwi 80

¹Ntshagte yobkwi. Num loṅe. Yobkwi Asaf. Yobkwi.

²(Pisito) ngabéb Israél, kù' ntoṅ nju'u. Wù z'o be ntshagte Yosèf mba bwoṅ nyàm nà, ṅwag ntùm nkuni mu, wù z'o tswe num ba kérubim nà.

³Bù' neta o nsi mbwe Efraim, Benjamin mba Manasé. Se' njwimte yage.

⁴O Nsi, bù'te yage! Ghù ndù se o ké' num bag ndù bag ghù njôge.

⁵Tshùaben, Nsi tàndà ntsho! O nsi ya ntù mba mba yu nzwit tshwèt nde't'o là tà kum à ndùke?

⁶O be nkém yub bàn ntsenyà. O be ngù bo nu ntsenyà k'a tshùa yube.

⁷O be ndo' yag ngù ju ntanta yi ba ndùla' bag. Ghakeban tshag be nzwi yage.

⁸Nsi tàndà ntsho, bù'te yage. Ghù ndù se o ké' num bag ndù bag ghù njôge.

⁹O lo fiaṅ mo' nkùa mà Egipto; o lo ta' ntumntum, kà mbwe i.

¹⁰O lo nabte dù' mbwe i, a taṅ nga, ndo' ngô fa.

¹¹Netshaṅ i lo kabte ba mbale, ntshùa mi be mba ntù mbwe' Nsi là.

¹²A lo ke nyit nkaṅ mi tà nkum mà dibantse, nsa sà' tse tà nkum mà ta'ntse.

¹³Numk'o nkebte kàb tse, mba zit ntshùanze lo nke mfôg nkùa à?

¹⁴Ngùnyàm fèn tshwèt ndag dù'; nyàm tshwèt nke njù dù'.

¹⁵Nsi tàndà ntsho, bèn nse' là. Tsin mfe kamànyam ndôte njene! Bèn ndèn njoṅ yen nkùa là!

¹⁶Tshètte ju ze bu o ze zwim bwe là, mba mén mandum z'o tsho' i là.

¹⁷Mbwôg kù i, bo keb i. A bwô ndù ben tse bo ton i, nkeb i là bite mbwe se o z'a kag bwôg num bo là.

¹⁸A bwô ndù bu o be num mèn z'a num bag bu o ze zwim nà. Num bon mèn nyiaṅtu ts'a na' nkwiagte là.

¹⁹Ndùlala bag ke nsi bèn nèn ngùanesà mbaṅ o. Ghù bag bèn njôge, ndù bag tsiaṅ lén so.

²⁰Tshùaben, Nsi tàndà ntsho, bù'te yage! Ghù ndù se o ké' num bag ndù bag ghù njôge.