Read Medumba Yobkwi 83 Bible Online

Yobkwi 83 - Medumba bible

Yobkwi 83

²O Nsi, kà tswe mba ketshob là. O Nsi, kà fite, kà tswe ntshu mi'i.

³Tshù, ghamaṅt'o tshwèt ntshu'u, Ghakeban tsho bù' tu yub nsi.

⁴Bo tsin tsham kebwô num yu nzwit mèn, ngù nkwate kebwô num ben ts'o be ntomte là.

⁵Nke ntshob ndù: Bin se' be biagte yub netèt ngôngô. Ndù kà bo bèn neju' lén Israél!

⁶Njoṅ yub fa be ngù ntù ntshù'. Bo wat kàn netèt bo neghù nu num o.

⁷Tse ntàb ba Edom mba tse ba Ismaél, tse Moab mba tse ba Hag,

⁸Guebal, Ammon, Amalék, ba Filistia boa ben tse bo tswe mà Tiro là,

⁹mba ngô Asiria tamte num bo. A fà ze bu neta bon Lot.

¹⁰Ghù bo ndaṅndaṅ mba Madian, ndaṅndaṅ mba Sisera, ndaṅndaṅ mba Jabin num fub ntsit mbaṅ Kison nà!

¹¹Bo lo biagte yub mà En-Dor. Bo lo tù' à ju netshab tsha' yi.

¹²Ghù kamkam tshob ndaṅndaṅ mba Oréb mba Zéeb là, ngù fenfen tshob ndaṅndaṅ mba Zebak mba Tsalmunna là!

¹³Nummbe bo lo tshob ndù: Be lo' tse dù'ntswe Nsi ngù tse be yi.

¹⁴Nsi àm, ghù bo be ndaṅndaṅ mba zim nà, mba bén ze fetmbaṅ tshwèt nket nèn yi là.

¹⁵Mba mbwôg z'a tshwèt nkù fèn nà, mba lambwôg z'a tshwèt nkù ba mbat là!

¹⁶Lo' fetmbaṅ o ngù bo vètte!

¹⁷Ghù tuswe kabte se yube, ndù bo diag lén so, me Tshùaben!

¹⁸A bwô ndù tuswe ke nko yube, a bwô ndù fétwut ke ngom yub njoṅ ndù fa. A bwô ndù tuswe ko yub kà bo zwiaṅte mbi!

¹⁹A bwô ndù bo lèn ndù nda' wù tù' o, ze lén so be Tshùaben nà, o b'a Nsi z'a be mfe tù là, mbèn nke nsa' njoṅ nsitsha' fa.