Read Medumba Yobkwi 88 Bible Online

Yobkwi 88 - Medumba bible

Yobkwi 88

¹Yobkwi bon Koré. Ntshagte yobkwi. Num neyob ntam. Yobkwi Héman, mèn Ezrak.

²Tshùaben, Nsi ngayôg àm! Me be nkua' mbwe o mbwôgtshù mba tèttswe'.

³A bwô ndù le't'àm zin nkum mbwe o! Kù' toṅ num tshàm nema' mbu!

⁴Nummbe ntù àm ywèt nukebwô. Yôg sàm nke ngebte mbaṅ ngô fe ben.

⁵Me b'a netèt ben tse bo tshwèt nswe' tsho ntùm ghem nà. Me b'a mba mèn ze neta ke' bèn mbe yi là.

⁶Bo nyil àm netèt fe ben, ndaṅndaṅ mba ben tse bo zwi yube, njab yub ntùm fi là, mba ben ts'o ke' bèn nekwimte yub là, mba ben tse bo fagte yub mum bu o là.

⁷O ma' àm ntùm belaṅ s'a tsho là, o ma' àm ntùm njame, mba ntùm ngeme.

⁸Yantù o be ndèt num àm. O be ngù njoṅ ntu'ntse mu fa vù num àm.

⁹O lo sô shun tshàm njam àm. Ngù me tù' tunu bwôg bo. Bo fùn àm, me ke ku'ni netume.

¹⁰Miag màm tshùag ngùtni. O Tshùaben! Me be ntsiaṅ lén so njoṅ lé'njù fa. Me be nyit mbu màm ntshag wù.

¹¹Ndù o ke ngù ba nsà à num fe ben ké? Fe ben be ndo nsi nyàmt'o ké?

¹²Be bo tshob nu num kondèn o ntùm fi ké? Be bo tshob nu num nenùn o ntùm ghem ké?

¹³Be bo lèn tshu tsho tse netshàm ntùm njam ké? Be bo lèn yu nunetsin ntùm tsha' ze bo lagt'é là ké?

¹⁴O Tshùaben, me be mbéb yu ywimte. Le't'àm be nse' mbwe o nkebnjù.

¹⁵Tshùaben, numk'o nke ntèn ntù àm à? Numk'o nke ndem àm se o à?

¹⁶Me b'a ngayennge' mba fenyu' mèn fe mum lé'njù nshum tshàm. Tsho fétwut te nkàn num àm, tu àm tshu'u.

¹⁷Tsho yantù be ntshùa num àm. Tsho fétwut be ngù me tù' ju banban.

¹⁸Bo be ndam àm mbum mba ntse là njoṅ lé'njù fa. Bo be nkul àm njoṅ yub fa yoṅ ntshù'.

¹⁹O be nta' shun tshàm mba ba mbaṅ ndà àm njam àm. Yàm nshunku tù' b'a nda' njame.