Read Medumba Yobkwi 89 Bible Online

Yobkwi 89 - Medumba bible

Yobkwi 89

¹Yobkwi Ethan, mèn Ezrak.

²Me nsi ke yob kondèn Tshùaben njoṅ ndù fa. Ntshu àm nsi ghù bo lèn nenùn o njoṅ ndù fa.

³Nummbe me tshob ndù: Kondèn o féb tun i nsi matmat. O lo te nenùn o mfe kamànyam.

⁴Me lo wat kàn bag mèn ze me tsho' i là. Tshù, me lo tshob nu bag ngafa' àm David nsaṅlaṅ bwe.

⁵Me nsi te nzwil o yoṅ ntshù', te ko'fen so matmat.

⁶O Tshùaben, kamànyam be ngamte mfa' mu mi nekuni! Ngamte nenùn o ntùm mbumte ben nelàne.

⁷We z'a ku'ni mfe kamànyam nefi'te ze nu bo Tshùaben à? We z'a fut'o netèt bon Nsi à?

⁸Nsi b'a ngafétwut ntùm mbumte ben nelàne. Nsi b'a mèn nekuni num ben tse bo diaṅ i mbum nà.

⁹Tshùaben, Nsi tàndà ntsho! We z'a be mèn neta mba wù Tshùaben. Nenùn o diaṅ o mbume.

¹⁰O be nkôgte ko'te wut dibantse. Ngelaṅ ze ntu'ntse ke mfe là, o kôgte yube.

¹¹O lo nyiaṅte Egipto mba fe ju là. O lo sate ghakeban tsho njam neta bu o.

¹²A b'a wù bèn ngù kamànyam bo tsha'a. A b'a wù bèn nte mba tshu ts'a ntùm bwe là.

¹³O lo nabte bag tu mba bag ntèn. Tabor mba Hermon be ntsiaṅte num lén so.

¹⁴Bu o b'a ze neta, bu o ta, bu o ze zwim lo tù.

¹⁵Nunetsin bo nu ndaṅndaṅ b'a ntom ko'fen so. Kondèn bo nenùn num mbwe o.

¹⁶Ghafen b'a ben tse bo lèn netô nta Tshùaben nà. O Tshùaben, bo nsi lo' nelàn z'a be mbwe o là nèn yi.

¹⁷Bo be ntsiaṅte num lén so ke tsin, nke ngamte yu nunetsine.

¹⁸Nummb'o b'a ghamte ze neta. A b'a yu bwôntù bèn nke mbù'te yag neta.

¹⁹Nummbe Tshùaben b'a yag tshètntsho, Nelàn Israél b'a yag mfen.

²⁰Tshù, o lo tshob nu mèn z'o be nkô i là mum njem. O tshob ndù: Me lo yi'te ywimt'àm ta' ngatshùa ntsho. Me lo tsho' ménnshum netèt benntùn.

²¹Me lo fon David, ngafa' àm. Me lo yo' i mfèt màm mi nelàne.

²²Bu àm nsi tomt'é. Bu àm nsi fà neta yi.

²³Ngakeban ke nsi ṅwag num i neṅwage. Mèn kebwô ke nsi bèn ghùtni i.

²⁴Me nsi nyiaṅte ghamaṅt'é mbwe i. Me nsi lab ben tse bo be mban i là.

²⁵Nenùn àm mba kondèn àm nsi be bo yi. Neta i nsi tshùa njam lén sàm lo nsi.

²⁶Me nsi yab bu i num dibantse, yab bu i ze zwim num ta'ntse.

²⁷Tu wul i nsi tsiaṅ lén sàm: O b'a tàa. Nsi àm mba gholoṅ yôg sàm!

²⁸Tu wul àm, me nsi lo' i ghù tuswe mén yi. Mèn ndùb ntshùate fenfen nsitsha'a.

²⁹Me ke nsi zi sô kondèn àm num i. Kàn sàm nsi b'a be nenùn yi;

³⁰me nsi ghù ze nzwit tswe matmat. Ko'fen se nsi tswe mba lé'njù ts'a kamànyam nà.

³¹A be ze bon tse ghua' ntshù' àm, ke ke nzin mat mb'a ntùm ntshù' màm nà.

³²A be ze bo bagte ntshù' màm, ke ke nze ntag màm nà.

³³Mba me nsi lo' kôg naṅ ntsha yi tu bo num mfànnu mube, lo' nto' netsham yub yi naṅ ntsha yi tu bo num nukebwô yub.

³⁴Là, me ke nsi zi sô kondèn àm num i, ke bènte njam num yàm nenùne.

³⁵Me ke nsi bagte kàn sàm. Ke bèn mbagte ju z'a tum num nkub ntshu màm nà.

³⁶Me lo lo' Nelàn àm nkàn mfe yi. Me nsi tatte David ké?

³⁷Nzwil i nsi tswe njoṅ ndù fa. Ko'fen se nsi be mbwe àm mba lagnyam nà.

³⁸Ndaṅndaṅ mba maṅwù là, ze netswe nsi b'a matmat. Ndaṅndaṅ mba yen ngakwénta ze nenùn z'a mum ndot là.

³⁹Mba ndùlala, o lo ghua'a, ntène. O lo ya ntù mèn o z'o yo' mfèt là.

⁴⁰O gha kàn ngafa' o. O ba'a, mbagte tshe' se.

⁴¹O lo bagte kàb tse, ngù njoṅ tse dù' lem fa tù' fam.

⁴²Njoṅ ghatshùanze fa be mbagte dù'. A tù' b'a ju tshabte mbwe ba ndùla' tse.

⁴³O lo bù' bu ghamaṅt'é ze zwim tù. Ngù njoṅ ghakeban tse fa nke ntsiaṅte.

⁴⁴O ku nsô ṅwi i, ke tomt'é mum ntsho.

⁴⁵O yab ndù num ghamaṅt'é, ma' ko'fen se mà nsi;

⁴⁶O lo ghù lé'njù nshum tse vôg, o ghù tuswe ghom i.

⁴⁷Tshùaben, tà kum à ndùke z'o nsi be ke bèn nelem yag se o njoṅ ndù à? Yantù o nsi ke kù mba mbwôg là tà kum à ndùke?

⁴⁸Kwimte njoṅ ze yôg sàm nsi tswe là, mbèn nkwimte ndù o lo nabte bon mèn nyiaṅtu à num ju banban.

⁴⁹Mènntùn num bwe z'a be a yôg ke zi njen vù là ké? Z'a be a yôg ntù i mum ngô fe ben nà ké?

⁵⁰Tshùaben, bwôntù o z'a na' mbe mbwe là b'a yà? Bwôntù z'o na' ntshob nsaṅlaṅ bwe David num bwe ntùm nenùn o là yà?

⁵¹Tshùaben, kwimte tshabte tse bo tshabte ghafa' tsho yi là. Kwimte ndù me be nket njoṅ tshabte ngôngô fa bam àm.

⁵²O Tshùaben, kwimte tse tshabte ghakeban tsho. Tshabte bo be mbe yi njam nku mèn z'o yo' i mfèt là.

⁵³Ghamte be Tshùaben njoṅ ndù fa. Amén! Amén! A bwô a be kua' ndùlala!