Read Medumba Yobkwi 91 Bible Online

Yobkwi 91 - Medumba bible

Yobkwi 91

¹We z'a be ntswe bam netshaṅ Nsi z'a tà mfe tù, nke mfite bam netshaṅ Nsi Nganeta à?

²A be ntshob Tshùaben ndù: Yàm ndàlem mba yàm ba' nebéb ngô yi, b'a Nsi àm ze me be njab ntù àm num i là.

³Nummb'a bèn nke nsô o ntùm nkù ngaghom saṅe, nsô o ntùm ngokét boa njoṅ nebagte fa.

⁴A nsi lo' mfe mi kabt'o yi. O nsi fon ndàlem bam mbàb mi. Nenùn i b'a tshètntsho mba nzwe tùne.

⁵O ke nsi bwôg fétwut z'a be tèttswe', ke két se bo be ma' i mbwôgtshù lo,

⁶ke ngokét z'a be nzin ntùm njam no, ke keya' z'a be mbiagte benntùn njagnyam nà lo.

⁷Ben ntsha' mbùm vù mbaṅ o, ben ntsha' gham vù num bag bu o ze zwim. Sàm ju ke nsi ghù o.

⁸A lo mbwô ndù miag mu lôte; njen mba ntsho'fa' ghatshùagntù be là.

⁹Nummb'o b'a yàm ndàlem me Tshùaben! O be ndo' Nsi z'a tà mfe tù là ngù yu ndàlem yi.

¹⁰Sàm nge' ke nsi se' num o, sàm nge' ke nsi ghebte num ntàb o.

¹¹Nummb'a nsi tshob Angél tse, ndù bo ke mbéb o num njoṅ manze tsho fa.

¹²Bo nsi kel o mum mbu mube, ndù k'o tsho' ku o num loṅ.

¹³O nsi zin num ngwayit mba num nyu. O nsi nyiaṅ mén ngwayit mba ngamnyu nku.

¹⁴Mb'a be nkô àm nà, me nsi tshu' i; me nsi tshètt'é mb'a lèn lén sàm nà.

¹⁵A nsi tsiaṅ àm, me bùnte yi. Me nsi be bag yi mum nge'. Me nsi tshu' i, me nsi ghù nku'ni yi.

¹⁶Me nsi ghù a ywèt lé'njù ts'a sag là. Me nsi ghù a yen yôg sàm.