Read Medumba Yobkwi 95 Bible Online

Yobkwi 95 - Medumba bible

Yobkwi 95

¹Bin se' bag bin yob kwi ṅwate mfà Tshùaben. Bag bin tshag nze ben tù, ntsiaṅ gholoṅ yôg be ntùm tsiaṅte.

²Bag bin nèn mbwe i ntùm ghamte. Bag bin fà nze njobkwi be tù ndo' nku'ni i yi.

³Nummbe Tshùaben b'a Nsi ndùb, a b'a mfen ndùb num njoṅ nsi fa.

⁴A be ntshùb ntômbo' ntùm bu i, a bèn ngù njoṅ ntu ba mbat fa.

⁵Yi ze dibantse b'a mi, nummb'a na' mbèn nabt'é là, yi ze tsha' neta b'a ze, nummbe mbu mi na' mbèn nabt'é là.

⁶Bin tsho, be bente nsi, ngwù nsi, nkwim ntunkekwi' mbwe Tshùaben nganabte be.

⁷Nummb'a bèn mbe Nsi be, nzwit mèn z'a be kin mbwe se là, bwoṅ nyàm ze bu i be ntshagte là. A be ze bin ju' nz'é sènni là,

⁸kà bin sag ntù tsin mb'a mbe mà Mériba, mb'a na' mbe num se lé'njù Masa, num kônkwa là.

⁹Dù' ze tà tsin na' ndaṅt'àm nà, dù' ze bo na' ndaṅt'àm mba bo yen mfa' màm nà.

¹⁰Yen zwiaṅ benntùn nà lo ghùtni àm num ngu'njù ṅam nkuà, me tshob ndù: A nzwit mèn ze ntù i bi là! bo ke' lèn tshàm manze:

¹¹Me tshob bo nkàn mfe mum yantù àm ndù bo ke nsi tsho ntùm yàm dù', yàm dù' fite.