Read Medumba Tànkùt 1 Bible Online

Tànkùt 1 - Medumba bible

Tànkùt 1

¹Tse tànkùt Salomon, nshum David, mfen Israél,

²num nelèn zenu bo nezi'te, num neju' ntshob nkum,

³num netshùb ju nezi'te ze ntùn, nunetsine, nunenùn bo nu ndaṅndaṅ;

⁴num negha' manze yi fùag benntùn bo ju'u, num neghù ndù nguanmèn lèn nu, nkwate nu.

⁵A bwô ndù nzenu kù' ntoṅ nju'u nkwi'te ze nelène; mèn z'a be nkum nà nsi ghù fùagwut ntùm ngùninu mi,

⁶num netshùb ju ze ta' tànkùt bo ta' ntshob ngùm tshwèt ndiag netshob là, num netshùb ntshob ghazenu boa ntshob lamte.

⁷Nebwôg Tshùaben b'a mbwe neto'te zenu. Kagni be ngwag nelèn zenu bo nezi'te.

⁸Nshum àm, ju' ju ze tàan zi't'o yi là, ke ghua' ju ze màan tswit'o yi là;

⁹nummb'a b'a ta' kétmbùm kondèn s'o ghù tu o là, mbe ta' ntshèn mi o ghù tô o là.

¹⁰Nshum àm, a be ze ben kebwô diag nefùt'o là, o zete ndù kà bo lo' tu o.

¹¹A be ze bo tshob ndù: Se' be nène; be bùn ko', be fètte lem, be bùn njwi' num mèn z'a tshwèt fite banban, ndù a b'a mbu' là,

¹²be mi i ntùn mba ngô fe ben nà, a nswe' mba ben bo nèn ntùm ghem nà.

¹³A nsi tshùa ndùlala be fon tshu tanjoṅ nzenze', ntsha' be lo' là dun ntùm mba' be.

¹⁴Be nsi ghabte o lo' yu bwe; mfe' njoṅ be fa nsi b'a nda' ntshù'!

¹⁵Nshum àm, kà bam ndù bin à bo tam manze nzine bémte bon manze bo tsin bwe là;

¹⁶nummbe nku mub be mfùag nsi num nukebwô, bo nke nànte nefètte lem.

¹⁷Là, mèn ke nzwi à ngelaṅ nebùn nkù num miag mba kelo z'a ghù mbàb mi là.

¹⁸Mbe se' mba bo là, bo ke mbùn ko' à be kua' num tu wut tshobe. Bo ke mbùn njwi' à be num bo.

¹⁹Tshù mb'a ke miagte num mba we lo z'a be ntshaṅ mbi num bin ntàn nà.

²⁰Zenu tshwèt nton ngoṅ num ba manze. A tshag nze tù num ba nsém.

²¹A ton ngoṅ ntshu mbu' ntshwèt. Num ba nsém, ntùm tusô, zenu tshwèt ntshob mi ntshob bo nju'u.

²²Ghafemni, bin nsi kô femni tà nkum à ndùke? Ghatshab ntshu nsi tshab ntshu tà nkum à ndùke?

²³Bin kaṅ wut zin nju' mba me tshobte là! Tshù, m'a' so ywèt tshàm num bin, ngù bin lèn ntshob màm.

²⁴Mba me tsiaṅ bin ke bam, mba me tshag bu àm mèn ke lôte,

²⁵mba bin ghua' njoṅ ntag màm fa, ke ke nkô ndù me tshobte zin nà.

²⁶Mba me yàm nsi zwi ndùse bin nsi be ntùm nge' là, me nsi tshabte zin ndùse bwôg nsi kab mbu num bin nà,

²⁷ngelaṅ ze bwôg nsi kab mbu num bin mba fetmbaṅ, nge' lam zin mbum mba zim, ngelaṅ ze nge' bo ntobni nsi tsho zin nà.

²⁸Bo nsi tsiaṅ yen ngelaṅ nà me vù mbu'u. Bo nsi diag àm, là ke fon àm.

²⁹Nummbe bo lo bàn nesiaṅte, ke kô netsho' nebwôg Tshùaben mba yub bag i là.

³⁰Nummbe bo lo ke kô ntag màm, ngwag neju' mba me na' ntshobte yub là.

³¹Bo nsi jù ju ze bo kab ntùm nzin mub là, bo nsi ywèl à kua' ko' mub ntag k'a fùn yube.

³²Nummbe nesab ndù' ghafemni be nzwi yube, kagni be mbe kwate mbe bo tswe fite, nke mbi.

³³Là mèn z'a be nju' ntshu àm nà nsi tswe à ntùm mbétni. A nsi yôg à ntùm fite, ke ke mbwôg sàm nukebwô.