Read Medumba Tànkùt 10 Bible Online

Tànkùt 10 - Medumba bible

Tànkùt 10

¹Tse tànkùt Salomon. Ta' nshum z'a be nzenu là be mfà tsiaṅte ntù ta' tà, ta' nshum z'a be nkagni là be mfà zwe ntù màab.

²Tshunkàb tshùagntù ke' be la' bàm mèn. Là nunetsin be ntshu' mèn bu vùkob.

³Tshùaben ke' be bam nziku' ya mèn netsine, là a num ntèn ntshàmntù ghatshùagntù ma' nsi.

⁴Bu z'a num ndô là be nkag bwoṅ, là, bu z'a be mfa' là be mfà fu'.

⁵Mèn z'a be ntse'te tshu ndù dum nà b'a ta' nshum z'a be nzete là! mèn z'a be nzi ngelaṅ netsho' tshu là b'a nshum z'a be nkag tuswe là.

⁶Mbotni num tu mèn netsine! Là, nu nefètte lem mem ntshu ghatshùagntù.

⁷Nekwimte mèn netsin ghù mbotni; là lén ghatshùagntù ke mbi à be nebi.

⁸Mèn z'a be nzenu ntù i là be ntshùb ntage, là mèn z'a be nkagni num nkub ntshu mi là bi ze.

⁹Mèn z'a be nzin num manze nenùn nà be mbe zin ke ke mbwôge. Là, mèn z'a be nzin à num ba lamte manze là, bo nsi fon tun i.

¹⁰Mèn z'a be nyu' miag là be nkag zwe mèn z'a be nkagni num nkub ntshu mi là ke nèn à nebi.

¹¹Là yôg be ntum ntshu mèn netsine, nu nefètte lem mem ntshu ghatshùagntù.

¹²Nkembàn be ntènte ntanta, là nkôni be nkàb fu num njoṅ nukebwô fa.

¹³Zenu be mbe num nkub ntshu mèn z'a be nsiaṅte là, là shua' b'a nelo' ndab mvèn mèn ze tu i ke' tsin nà yi.

¹⁴Ghazenu be ndé' nesiaṅte. Là ntshu nkagni nsi tam mfam kà ke ghubte.

¹⁵Nkàb be mbe ngankàb à mba tusô se bo kut ntsham ntsiag là, ze nevù ghayennge' b'a bwoṅ yub.

¹⁶Nkàbfa' mèn netsin be mfà yôg, ntsho'fa' ngatshùagntù nke njam nukebwô.

¹⁷Mèn ze bo tswit nkùn num i a nke nkwimte là be ntshùb manze yôg, là mèn z'a be ngwag mba bo tshobt'é là ke mfàn à be manze.

¹⁸Mèn z'a be nkabte nkembàn ntù i là b'a ngamfùm, mèn z'a be ndo' ndàm ṅam la' yi là be kagni.

¹⁹Mèn tshob yàm mb'a ke tag ke ghù nukebwô, là mèn z'a be ntshùb lém se là b'a ngazete.

²⁰Lém mèn netsin b'a silba tanjoṅ, ntù ghatshùaghtù ke b'a sàm ju.

²¹Nkub ntshu mèn netsin be ntshagte benntùn yàme, kagni be nkwù à nummbe nkwate bwoṅ bo.

²²Mbotni mi a fe Tshùaben nà bèn nke mfà fu' a ke' be bam ndù mo' sàm zwe be njam sen fu' là.

²³Neghù kebwô be nkagni à mba sa là. Là zenu b'a ze mènntùn z'a be nsiaṅte là.

²⁴Ngatshùagntù be mbwôg nu a tsho i; ben netsin be nkô mba kelo Nsi fà bo.

²⁵Ngatshùagntù ke ndamte mbi a mba zim nà. Là mèn netsin taṅ nga a matmat.

²⁶Ndô be mèn z'a tum i l'a ndaṅndaṅ mba tshùag ndu' be mbe num nsô mèn, mba nzembwôg be mbe num miag mèn nà.

²⁷Nebwôg Tshùaben be nkwi'te tse lé'njù mènntùn, là tse ngu'njù ghatshùagntù ke nsébt'a nesébte.

²⁸Ben netsin ke mbéb à nda' tsiaṅte; là ze nenywinte ghatshùagntù nsi bi to'o.

²⁹Manze Tshùaben be mèn nenùn à mba ta' ndàlem nà, là, mbe ze nevù njoṅ ghafànnu fa.

³⁰Sàm ju ke nsi nyi'te mèn netsine, là ghatshùagntù ke nsi tswe ntùm ngô.

³¹Ntshu mèn netsin be mfà zenu; là bo nsi keb lém s'a be ngù nukebwô là.

³²Nkub ntshu mèn netsin lèn kondèn, là lém ghatshùagntù lèn yub à nukebwô.