Read Medumba Tànkùt 13 Bible Online

Tànkùt 13 - Medumba bible

Tànkùt 13

¹Ta' nshum z'a ze nu là be nju' ju ze tàab zi'te yi là, là ngatshabte ke' be bam ndù bo tshobt'é.

²Ben mebwô nsi jù bin ntshob mi a tum ntshu bo là, là ju ze ghamfùm be nkù ntù bwe là b'a nefètte lem.

³Mèn béb ntshu i mb'a' yôg tu i, mèn z'a ke' be tshùb nkub ntshu mi là ke nenèn bi.

⁴Ntù ndô be nkô tshu tse be mbu mi ke ku' bwe là, là mba ke lo ntù ghafa' kô là, bo ku'ni neghù.

⁵Mèn netsin be mbàn ntshob tatte; ngatshùagntù be mbagte wul i, nke ngù tshu tuswe.

⁶Nunetsin be mbéb mèn ze manz'é b'a ze nenùn nà, là tshùagntù nke mbiagte mèn kebwô nebiagte.

⁷Mo' mèn be ndo' wul i mba ngankàb là, ndù ju ke nsi, mo' lo' wul i mba mbwoṅ nà, là ndù a ghù yàme.

⁸Nkàb mèn b'a num nelo' njun tu i yi; là, a ke' ywimte mb'o mi ma'ni mbwoṅ.

⁹Ben netsin b'a mba nelàn z'a tshwèt nké' kua' mebwô là, là ghatshùagntù b'a mba lambo s'a tù' à nebi là.

¹⁰A b'a nda' ko'tewut bèn nke ntènte ndù ntanta be nsi, là zenu be mbe boa ghaju' ntage.

¹¹Nkàb tsho mèn ndende mb'a' kôg i, là nkàb ze mèn be ntse't'a nda'nda' là be nèn à mbwe.

¹²Bo jù' nenywint'a nejù' mba ntù a' ke ngone, là mèn kô ju a bumte mb'a b'a kua' tsiaṅte ntù i neke nèn be mbwe!

¹³Mèn z'a be ngwag ntshob ntag ntùn nà, num mbi, là mèn z'a be mbwôg ntag là nke ngù nda'.

¹⁴Ze netswite nzenu b'a tumnsi ntse yôg a num nkaṅ mèn nsô i ntùm njwi' vùkob.

¹⁵Nkwate mebwô be mfà nku'ni, là ze manze ghamfùm ta neshu.

¹⁶Mba zit ngazete lo be ndo' nelèn ngù nu yi, là nkagni be nsate bà i nsi.

¹⁷Ngantum z'a b'a ngatshùagntù là be ndo' nge' nse' yi, là ngantum ze nenùn nke ndo' neyate nse' yi.

¹⁸Bwoṅ bo tuswe b'a mi ntsi' mèn z'a be nga netswit nkùn nà, là mèn ze bo be ntshobt'é a bam nà, bo num ngamt'é.

¹⁹Mèn kô ju a bumte mba ntù i nsi dùmt'é; kagni be nga tshob nekù nukebwô.

²⁰Mèn ke njôg boa ghazenu mb'a nsi tù' nzenu, là mèn z'a be nzin boa kagni là be njen kebwô.

²¹Nge' be ntam njam ghaghù nukebwô, là fu' be ze nda' ben netsine.

²²Ngaghù mebwô be mfaṅ tshu ts'a bon bon tse. là, bo num ndé' tse nkàb mèn kebwô num nefà mèn netsine.

²³Nà ze mbwoṅ tem nà be mfà jujù yàme, là fa' se ke nèn mbwe, nummbe nunetsin ke' be.

²⁴Mèn z'a ke' be tam shua' mvèn nshum i là, be ntam shua' mvèn i num ngelaṅ ntùn.

²⁵Mèn netsin be njù ju kà ntshu i tshùa. là bam ghatshùagntù be ntshu' kekua.