Read Medumba Tànkùt 14 Bible Online

Tànkùt 14 - Medumba bible

Tànkùt 14

¹Nzenu mènnzwi be kut ba' i, nkagni mènnzwi nke ndo' ko' mi mbu ntèn yi naṅ nsi.

²Mèn z'a be nzin ndaṅndaṅ nà be mbwôg Tshùaben, là mèn z'a tshùb manze tse neṅu'te là nke ngwag i.

³Ta' shua' num ntshu nkagni, mb'a num ko'tewul i, là nkub ntshu ghazenu be mbéb yube.

⁴A be ze ba nyàmna' ke' be nsi là, mba let jujù nyàm nsi b'a nge, a b'a ngù' ba nyàmna' bèn nke ngù jujù njàme.

⁵Ngakwénta ze nenùn ke' be tatte, là ngakwénta tatte num ntshob tatte.

⁶Ngatshabte num ndiag zenu là ke fon, là, a fùag mèn z'a be nsiaṅte là nefon zenu.

⁷Kù nkagni, nummbe b'o ke yen nesiaṅte num nkub ntshu mi.

⁸Zenu ngazete be nda'te yi mba be a zin nà, fùte bèn mbe bà ze kagni ghù là.

⁹Kagni be ndo' nukebwô ngù à sa yi; là bwôntù Tshùaben b'a netèt ben netsine.

¹⁰Ntù be ndèn ko' tse zwe a be bo ngùn ke tamte ntsiaṅte.

¹¹Bo nsi sate ba' ghatshùagntù là ntàb ben netsin nsi te'e.

¹²Mo' manze be ntsin num miag mo' mèn, mbe miagte ntù' manze vùkob.

¹³Ntù ghù nenywin mba ndùs'a tshwèt nzwi là; tsiaṅte be miagt'a zwe mo' ngelaṅ.

¹⁴Mèn ze ntù i bi là nsi ywèt num tse manze, mèn mebwô ywèt num mfa' mi.

¹⁵Mèn banban be mbàn njoṅ ntshob fa mi bo tshob yi là. Là ngazete nke ndôt'a mi nzin.

¹⁶Nzenu be mbwôge, nke nsô wul i num nukebwô, là nkagni be nka'te, ntswe ke ke ntshàme.

¹⁷Ngavôgte num yantù ke ngù à mba mbabun nà, mèn ze nkwate kebwô be ntù i là, be nsoṅ nkembàn nso num i.

¹⁸Mi ntsi' nkagni b'a bà, là nesiaṅte be kétmbùm ghazete.

¹⁹Ben kebwô nsi vù mbwe ben mebwô ghatshùagntù nsi tsin nzendà ben netsine.

²⁰Mba kua' nshun mbwoṅ be mbàn i, là ben bo num nkô ghankàb là gha' mbu.

²¹Mèn z'a wag mfèl i là ghù nukebwô, là mèn z'a ko ndèn ghayennge' là b'a mènfen.

²²Ben tse bo be nkwate nukebwô là ke' ke nebi ké? là ben tse bo num nkwate numebwô bo nunenùn nà be ngù a bwô.

²³Mba sit fa' lo be mfà fu' yàme, là ntshob tùtù ke ndo' à kekua nse' yi.

²⁴Nkàb be ghazenu à mba ta' kétmbùm nà, bà be nkagni à be bà njoṅ ndù fa.

²⁵Ngakwénta ze nenùn be ntshu' benntùn, là ngatatte nke mfùte z'a be nefùte.

²⁶Mèn z'a be mbwôg Tshùaben nà ghù kua' dù' ntùn z'a yé'te bwe là, bon tse bèn ngù ndàlem mbaṅ i.

²⁷Nebwôg Nsi b'a tumnsi ntse yôg, num nekaṅ mèn nsô i ntùm njwi' vùkob.

²⁸Ngô be njàm mb'a mi nkuni ta' mfen ngô tsi nsi, mba nkam a' vù nsi.

²⁹Ngasiaṅte b'a mèn z'a be ndèt wut num yantù là, là mèn z'a be mvôgte neya ntù là b'a ngaghù tshu bà.

³⁰Ntù nebétni b'a yôg wut mèn, là ghe'te b'a nyu' z'a ntùm mvôg là.

³¹Nefétte mbwoṅ b'a netute mèn z'a nabt'é là, là, o ko ndèn njennge' mb'o so nku'ni yi.

³²Tshùagntù ngatshùagntù be ma' i nsi, là mèn netsin be mfon ndàlem mba ndùs'a kwù là.

³³Ntù z'a be nsiaṅte là ghù zenu ntùm bwe, k'a nsi la'te wul i netèt kagni kà bo lèn i à?

³⁴Nunetsin be mbù'te ta' ngô, là nukebwô be nkag tuswe num ngôngô.

³⁵Mfen ke ngù mebwô à ngafa' i z'a zete là, yantù b'a num z'a kag tuswe tu i là.