Read Medumba Tànkùt 15 Bible Online

Tànkùt 15 - Medumba bible

Tànkùt 15

¹Mbùn ntshob nebétni be nkôg tshùagntù là neta ntshob nke mbù'te yantù.

²Ntshob ghazenu be ngù mèn kô nesiaṅte, ntshu nkagni ke nsa ze à bà.

³Miag Mbom be mbe njoṅ dù' fa, nke ndôte ghatshùagntù boa ben kebwô.

⁴Lém nebétni be ngù mèn nèn be mbwe! Là ntshob nukebwô nke ntshèt ntù mèn à netshèle.

⁵Nkagni ke' be bam ndù tàab tswit nkùn num i, là mèn z'a be mbam ndù bo tshobt'é là ke ndo' à zete ngù mba kelo yi.

⁶Mà fu' ndùb be mbe ntùm ndà mèn netsine, là va' be mbe ntùm bin ntàn tse ghatshùagntù ghù là.

⁷Nkub ntshu ghazenu be mfà nesiaṅte, là nu ndaṅndaṅ ke ntù kagni.

⁸Jule'te ghatshùagntù num mbag Tshùaben. Là, ze nele'te ben netsin be mbwô i neshu.

⁹Ngùninu ngatshùagntù num mbag Tshùaben, là, a num nkô mèn z'a tam njam nunetsin nà.

¹⁰Bo nsi tswit nkùn kebwô num mèn z'a kag manze ndaṅndaṅ nsi là, mèn z'a wag mba bo tshobt'é là nsi kwù.

¹¹Ngô fe ben bo ghem tsho' nte nge mbwe Tshùaben, ntù benntùn ke' b'a nge mbwe i ntshùate ké?

¹²Ngatshabte ke' be bam ndù bo tshobt'é, a ke' be nèn mbaṅ ghazenu.

¹³Ntù o be mebwô mb'a tum num se o, là ngùtni be ntù o mba wul o ke kwi.

¹⁴Ntù z'a ghù zenu là be ndiag nesiaṅte, là ntshu kagni ke nsoṅ z'a be tshô bà.

¹⁵Njoṅ tse lé'njù njennge' fa ke mb'a be tse kebwô, là ntù z'a tswe mebwô là ke njù z'a be njùa njoṅ ndù fa!

¹⁶Mebwô b'a neghù a kag, o nke mbwôg Tshùaben, ntshùa neghù tshunkàb yàme, nke nywine.

¹⁷Mebwô b'a nefèt ka njab dù' ze nkôni be là ntshùa ta' mfô z'a tshote, là nkembàn lo' la' là.

¹⁸Ngafètte lem be ntènte ntanta, là mèn z'a be ndèt wut num yantù là be mbotte tantshu.

¹⁹Manze ndô b'a mba kàb njô là, là manze mèn netsin b'a ze bo tswe' mebwô là.

²⁰Nshum z'a ze nu là be mfà tsiaṅte ntù tàab, là nkagni be ngwag màab.

²¹Bà be ngù nkagni ke tsiaṅte, là ngasiaṅte ke ntshùb ze manz'a ndaṅndaṅ.

²²Ntàmtenu be mbi ngelaṅ ze ntag bwoṅ nà, là, ntàmtenu be mbumte ndùse ghafà ntag yàm nà.

²³Be mèn tsiaṅte ndùs'a fà mbùn ntshob ntùn nà, là, a bwô netshob ntshob ntùn a kua' num ngelaṅ ntùn.

²⁴Nzenu lèn ze mbe manze yôg b'a ze ko'ko', ndùlala ndù a kù manze swe'swe' z'a ke nèn à ngô fe ben nà.

²⁵Tshùaben num ntèn ba' ghako'tewut ma' nsi, là nke ngù ndoṅ ndùnsi mfôg mènnzwi ta nsi.

²⁶Nkwate nukebwô be mbag Tshùaben, là ntshob ntùn be mbwô num miag mi.

²⁷Mèn z'a be nkô bin ntàn neshu là be mbagte ze ndà, là mèn z'a ke' be nkô ba nda' là nsi yôg tse.

²⁸Ntù nzenu be nkwate kà mbùnte, là ntshu ghatshùagntù be nsô ba tshùagntù neshu.

²⁹Tshùaben ke ntsin à ngùanesà mbaṅ ghatshùagntù là, a be nju' le'te ben netsine.

³⁰Lag nesate be mfà tsiaṅte ntù mèn, ta' tshô ntùn be ntshàb mvôge.

³¹Mèn z'a kù' ntoṅ mba bo tshobt'é yôg i là nsi tswe netèt ghazenu.

³²Mèn z'a be ngua' netswit nkùn nà ke ngwag à tu wul i, là mèn z'a bam ndù bo tshobt'é là ghù zenu.

³³Nebwôg Tshùaben be ntswite zenu; mbétni bèn nke mbe mbwe ghamte, nefà wut nsi.