Read Medumba Tànkùt 18 Bible Online

Tànkùt 18 - Medumba bible

Tànkùt 18

¹Mèn z'a be nsô wul i num tsemo' ben nà ke ndiag à tshu ts'a bwô i là; a ke' be lo' sàm ntag mba ju là.

²Nkagni ke' be yen tse nesiaṅte ntù i tsiaṅte, là, a be nkagtùn nela't'a ju z'a ko' ntù i là.

³Wag ke nzin à ku ntshù' bo tshùagntù, tuswe be nte nsi, mba wut nebe ke vèt num mfànnu a' tswe mbaṅ i.

⁴Ntshob mi a be ntum ntshu mènntùn nà ke ntsho à mba ntse là, koṅntse z'a tshwèt mbùn nswe' là be dù' zenu ke ntum nà.

⁵A ke' bwô nebe tomte ngatshùagntù ntù' biagte ze nu mèn netsin ntùm kame.

⁶Nkub ntshu nkagni be ntsho ntùm ba ntanta, ntshu i ghù nto' te nsi.

⁷Ntshu nkagni be nso i kame, nkub ntshu mi b'a ywi' num yôg se.

⁸Ntshob nga ndàm b'a mba bon tshu nelamte là; a be ntshote mèn tà nèn nkum ntùm mbi mi.

⁹Mèn z'a be ndô tshwèt fa' là b'a mfèt mèn z'a tshwèt nsate nesate là.

¹⁰Lén Tshùaben b'a mba mà nesà ba' là; mèn netsin be nkù nèn ndem bwe, ke bèn mbwôg tse sàm ju.

¹¹Fu' ngaju ke mbe num miag mi à mba se tusô s'a kut ntsham ntsiag là; a be ntùm mi nkwat'a mba ta' kàbngô z'a nèn tù neshu là.

¹²Ntù mèn ke nka'te neshu o lèn mbe ze nevù ghebte; mbétni bèn nke mbe mbwe ghamte.

¹³Mèn bam ke ju' mb'a fut'a mbabune, mbèn nke nsoṅ à tuswe nso num tu wul i.

¹⁴Ywèt mènntùn be ntomt'é ntùm ngokèt; là ywèt ts'a bot là, we z'a nsi bù't'é à?

¹⁵Ntù z'a be nsiaṅte là be ndène, ntoṅ mi a ze nu là num ndiag nesiaṅte.

¹⁶Mènntùn be mfà nda', mb'a' tsho' manze yi, ndo' i nèn nte mbwe ben ndùbndùb.

¹⁷Mèn be mbwôgmbwe ntsho'te kame, a tswe mba ndù a loṅ kam nà; là, mèn bo yi be tù là lo nsi ntswit nkùn num bwe.

¹⁸Bo be ntam tô, a miagte tshunu, nsoṅ mba bo nsi fagte ba nduku yi là.

¹⁹O be nkag mfaṅ ntù mfèl o nebèn ntsho num i ta ntshùa tusô se bo kut ntsham ntsiag là; tse ntanta fètfèt b'a mba mfùn ta' tusô là.

²⁰Mènntùn ke ndo' à tàm se ntshu i yàm nà nkém wul i yi; a ke ndo' à ju ze nkub ntshu mi yàm nà njôg yi.

²¹Vùkob bo yôg b'a mum mbu lém, mèn z'a be nkô i là nsi jù tàm s'a yàm nà.

²²Mèn z'a fon ta' mènnzwi là mb'a fon fu'; a b'a ta' fen se Tshùaben fà yi là.

²³Mbwoṅ be mbe tshob nke ma' mbu, là ngankàb be bùnte ndo' à tshùag.

²⁴Mèn z'a ghù shun yàm nà ke ndiag à nge' nso num i, là mo' ta' nshun be ndat num mèn ntshùa mfèl i.